Японияда денгиз рептилияларининг номаълум тури топилди

Окаяма фан университети ва бошқа илмий муассасаларнинг тадқиқот гуруҳи 1990 йилларда Японияда топилган бўр даврига оид рептилия қолдиқлари илгари ўрганилмаган янги турга тегишли бўлиши мумкинлигини эълон қилди. Ушбу қолдиқлар бундан 80-65 миллион йил аввал яшаган йирик денгиз рептилиялари – мозазаврлар турига мансуб деб ҳисоблаб келинаётган эди. Бу ҳақда “Kyodo” хабар берди.

Нашрнинг ёзишича, 1990-1992 йилларда Кайдзука шаҳрида топилган тош қотган қолдиқлар Осака префектурасининг Кисивада шаҳридаги Табиат тарихи музейида сақланиб келган. Бироқ қолдиқларни ўраб турган тоғ жинсларини ажратиб оладиган ускуналар йўқлиги сабабли, улар устида чуқур таҳлил ўтказилмаган. Сўнгги йилларда бутун дунёда мозазаврларни ўрганиш ишлари сезиларли даражада олдинга силжиди.

Олимлар музейдаги тош қотган қолдиқларни тозалаш ва кўздан кечиришга муваффақ бўлди. Улар юқори жағнинг шу пайтгача ҳеч қаерда учрамаган уч қисмини аниқлади. Ҳайвоннинг узунлиги, эҳтимол, 6 метр атрофида бўлган. Унда бошқа мозазаврлар қолдиқларига хос бўлган қон томирлари ўтадиган ариқча мавжуд бўлмаган. “Kyodo”нинг ёзишича, айнан мана шу маълумотлар ҳайвоннинг янги тури ҳақида далолат беради.

Эслатиб ўтамиз, аввалроқ Уэльс қирғоқларида денгиз тўлқинлари билан бирга ноодатий юзлаб майда, ёрқин, кўк рангли денгиз жонзотлари пайдо бўлгани ҳақида хабар берилган эди.