2027 йилдан бошлаб санъаткорлардан даромад солиғи мажбурий ундирилади

2027 йилдан бошлаб санъаткорлардан даромад солиғи мажбурий тарзда ундирилади. Бу ҳақда бугун, 1 апрель куни АОКАда ўтказилган матбуот анжуманида Солиқ қўмитаси раисининг биринчи ўринбосари Мубин Мирзаев сўз очди.

Унинг билдиришича, бугунги кунда кўплаб санъаткорлар даромад солиғи тўламаяпти. Шу сабабдан ҳозирда солиқ ундириш бўйича механизм ишлаб чиқилмоқда. Амалдаги тартиб бўйича улар декларация тўлдириши, даромадларини кўрсатиши керак ва шу асосда солиққа тортилиши зарур.

“Энди тан олишимиз керак, ҳақиқатдан жуда кўпчилик санъаткорларимиз бунга риоя қилмаяпти. Ўз даромадларини тўлиқ декларация қилмаяпти ва шу даромадлардан солиқлар ундирилмаяпти. Ҳозир хуфиёна иқтисодиётга қарши курашиш доирасида қарор лойиҳасини тайёрлаяпмиз”, дейди Мубин Мирзаев.

Мирзаевга кўра, 2025 ва 2026 йилларда даромадлар декларациясини тўғрилаб, топшириш бўйича имконият берилади ва бу даврда улар жазоланмайди. 2027 йил 1 январдан бошлаб эса агар улар ўзларининг даромадларни тўлиқ кўрсатмаса ёки солиқлардан қочиш бўлса, уларга нисбатан солиқ назорати текширувлари ўтказилиб, солиқ ҳисоблаб, ундирилади.

“2027 йил 1 январдан бошлаб бирорта санъаткор, жисмоний шахслар ўзларининг даромадларини декларация қилмаслигини ёки солиқдан қочишини имкони бўлмайди”, дейди Мирзаев.

Билдирилишича, бугунги кунда Ўзбекистонда 18 миллиондан ортиқ даромадга эга солиқ тўловчи бор. Шунингдек, ҳозирда мамлакатда тўланмаган фаол солиқ қарздорлиги 8,5 трлн сўмга тенг.

Эслатиб ўтамиз, аввалроқ Мубин Мирзаев мазкур матбуот анжуманида Хитойга тегишли бўлган Temu маркетплейси Ўзбекистонга тахминан 46 млрд сўм миқдорида солиқ тўламаганини айтган эди.