2023 йилги Уимблдон ғолиби 4 йилга дисквалификация қилинди

Халқаро теннис яхлитлиги агентлиги (ITIA) чехиялик теннисчи Маркета Вондроушовани допингга қарши қоидаларни бузгани учун тўрт йил муддатга дисквалификация қилди. Бу ҳақда ташкилот матбуот хизмати хабар берди. 

Маълум қилинишича, жазо теннисчининг 2025 йил декабрь ойида допинг назоратидан ўтишдан бош тортгани билан боғлиқ. Вондроушова бу қарорини стресс, руҳий саломатлик билан боғлиқ муаммолар ҳамда хавфсизлиги юзасидан хавотирлар билан изоҳлаган.

Бироқ мустақил трибунал ишни кўриб чиқиб, антидопинг назоратини ўтказишга уринган мутасаддининг кўрсатмаларини ҳам инобатга олган ва спортчининг рад жавоби учун ҳеч қандай асосли сабаб бўлмаган, деган хулосага келган.

Дисквалификация муддати 2030 йил 21 июнда якунланади. Ушбу давр мобайнида Вондроушовага Халқаро теннис федерацияси, Аёллар теннис ассоциацияси, Профессионал теннисчилар ассоциацияси, “Катта дубулға” турнирлари ёки миллий теннис уюшмалари томонидан ташкил этиладиган ва тасдиқланадиган мусобақаларда иштирок этиш, мураббийлик қилиш ҳамда бошқа расмий фаолият билан шуғулланиши тақиқланади.

Шунингдек, Халқаро теннис федерацияси ва миллий антидопинг ташкилоти мазкур қарор устидан Спорт арбитраж судига шикоят киритиш ҳуқуқига эга.

Маълумот учун, 26 ёшли Вондроушова айни пайтда жаҳон рейтингида 122-ўринни эгаллаб турибди. У жорий йилнинг январь ойидан буён мусобақаларда иштирок этмаяпти. Ўшанда у Австралиянинг Аделаида шаҳрида бўлиб ўтган турнирнинг иккинчи босқич баҳсидан четлатилган эди.

Чехиялик теннисчи фаолияти давомидаги энг юқори натижасини 2023 йилда қайд этган. Ўша йили у жаҳон рейтингида 6-ўрингача кўтарилган ва фаолиятидаги ягона “Катта дубулға” турнири – Уимблдон мусобақасида ғолиб чиққан.

Бундан ташқари, Вондроушова 2019 йилда Франция очиқ чемпионати финалигача етиб борган, 2021 йилда эса Токио Олимпиадасида кумуш медаль соҳиби бўлган.