2018 йилги Жаҳон чемпиони фаолиятини якунлади

Франция терма жамоаси сафида Жаҳон чемпиони бўлган Самюэль Умтити футболчилик фаолиятини якунлаганини эълон қилди. Испаниянинг “Барселона” жамоаси собиқ футболчиси 31 ёшида бутсаларини михга илишга қарор қилди. Бу ҳақда футболчи Instagram тармоғи орқали хабар берди.

“Кўтарилишлар ва пасайишлар бўлган фаолиятимни якунладим. Хайрлашиш вақти келди... Мен футбол учун боримни бердим ва бундан ҳеч қачон афсусланмайман. Бирга ўйнай олган барча клубларим, президентлар, мураббийлар ва футболчиларга раҳмат айтмоқчиман. Шунингдек, мени доим қўллаб турганларга миннатдорлик билдираман”, дейди Умтити хайрлашув постида.

Самюэль Умтити Франция термаси сафида 31 та учрашувда майдонга тушган. Унинг ҳисобида 4 та гол бор. У терма жамоа сафида 2018 йилда бўлиб ўтган ЖЧда ғалаба қозонган. 

Ҳимоячи футболчилик фаолияти давомида Франциянинг “Лион”, Испаниянинг “Барселона”, Италиянинг “Лечче” ва Франциянинг “Лилль” каби топ тепган. У сўнги пайтларда такрорий жароҳатлар ва тиззасидан қилинган операция туфайли кам ўйин амалиётига эга бўлаётган эди. Шу сабабли футболчи фаолиятини якунлашга қарор қилди. Жароҳатлар сабабли франциялик ҳимоячи фаолияти давомида жами 208 та учрашувда майдонга туша олмаган.

Маълумот учун, Умтити 2016 йилда “Барселона” жамоасига бориб қўшилган эди. Умтити Испаниядаги 7 йиллик фаолияти давомида 2 марта Ла Лига чемпионлиги ва 3 та Испания қироллик кубогини қўлга киритган.