20 банддан иборат тинчлик режаси келишиб олинди – Зеленский

Украина Президенти Владимир Зеленский Киев ва Вашингтон ўртасида Флоридада бўлиб ўтган музокараларда у таклиф қилган 20 банддан иборат тинчлик режасининг 90 фоизи келишиб олинганини айтди. Бу ҳақда у кеча, 28 декабрь куни Россия–Украина можаросини тартибга солиш бўйича музокаралар якунларига бағишланган матбуот анжуманида сўз очди.

Унинг айтишича, АҚШ томони хавфсизлик кафолатлари бўйича бўлимларни тўлиқ қўллаб-қувватлаган.

Украина Пезиденти Владимир Зеленскийнинг маълум қилишича, Киев ва Вашингтон ўртасида Флоридада бўлиб ўтган музокараларда у таклиф қилган 20 банддан иборат тинчлик режасининг 90 фоизи келишиб олинган.

“Биз тинч йўл билан ҳал этишнинг барча жиҳатларини муҳокама қилдик. 20 банддан иборат тинчлик режаси 90 фоизга келишилди”, деган Зеленский. 

Шунингдек, унинг сўзларига кўра, Америка томони АҚШ томонидан бериладиган хавфсизлик кафолатларига оид бўлимларни “100 фоиз” қўллаб-қувватлаган. Бундан ташқари, Вашингтон, Киев ва Европа давлатлари хавфсизлик бўйича қўшма кафолатлар масаласида “деярли” келишувга эришган.

Трамп ва Зеленский ўртасидаги музокаралар 28 декабрь куни Флоридада бўлиб ўтди. Унда тинчликни тартибга солиш масалалари, жумладан АҚШ тинчлик режаси ва унга киритилган тузатишлар муҳокама қилинди.

Учрашувдан олдин Трамп Россия Президенти Владимир Путинга қўнғироқ қилган, шунингдек, Зеленский билан учрашувдан кейин ҳам Россия раҳбари билан яна боғланиш ниятини билдирган.

24 декабрь куни Зеленский ўзининг 20 банддан иборат тинчлик режасини тақдим этган эди. Ҳужжатга кўра, Украина НАТО Низомининг 5-моддасига ўхшаш хавфсизлик кафолатларига эга бўлиши керак (яъни бир давлатга ҳужум барча аъзоларга ҳужум деб қаралади). Кремль эса бу режа ҳақида салбий фикр билдирган. 

Эслатиб ўтамиз, аввалроқ Дональд Трамп ҳам Зеленский билан учрашувда масалаларнинг 95 фоизи бўйича келишувга эришилганини айтганди.