Биз 95 фоиз масалани ҳал қилдик – Трамп

Украина етакчиси Владимир Зеленский билан учрашувим жуда яхши ўтди. Бу ҳақда АҚШ Президенти Дональд Трамп кеча, 28 декабрь куни Зеленский билан Россия–Украина можаросини тартибга солиш бўйича ўтказилган музокаралар якунларига бағишланган матбуот анжуманида сўз очди.

Трампнинг айтишича, унинг Владимир Зеленский билан учрашуви ҳамда Владимир Путин билан бўлиб ўтган телефон суҳбати жуда яхши ўтган.

“Биз мақсадга жуда яқинмиз, балки ниҳоятда яқинмиз ҳам. Жуда аъло учрашув бўлди. Жуда кўп масалаларни муҳокама қилдик”, деган Америка раҳбари. 

У Зеленский билан учрашувда масалаларнинг 95 фоизи бўйича келишувга эришилганини аниқлик киритди. Қолган бир-икки масала эса “келгуси бир неча ҳафта ичида” муҳокама қилинади.

Трампнинг сўзларига кўра, ҳудудий масала ҳал этилмай қолмоқда. Шу билан бирга, у томонлар бу масалада ҳали якуний келишувга келмаганини таъкидлади. 

“Украиналикларнинг 91 фоизи урушнинг тугашини истайди. Россия ҳам унинг тугашини истайди. Ҳамма унинг тугашини истайди”, деган Трамп. 

Қайд этиш жоиз, кеча, 28 декабрь куни АҚШнинг Флорида штатидаги Мар-а-Лаго қароргоҳида АҚШ Президенти Дональд Трамп ва Украина етакчиси Владимир Зеленский ўртасидаги учрашув бўлиб ўтди. Томонлар учрашувда АҚШ томонидан таклиф этилган тинчлик режасини муҳокама қилди. Музокаралар бошланишидан аввал икки етакчи журналистлар учун қисқа баёнот берди, лекин музокаралар ёпиқ эшиклар ортида бўлиб ўтди. 

Эслатиб ўтамиз, аввалроқ Дональд Трамп Украина раҳбари Владимир Зеленский билан учрашув олдидан Россия Президенти Владимир Путин билан телефон орқали мулоқот қилгани ҳақида хабар берилганди.