Трамп Зеленский билан учрашишдан олдин Путинга сим қоқди

Кеча, 28 декабрь куни АҚШ Президенти Дональд Трамп Украина раҳбари Владимир Зеленский билан учрашув олдидан Россия Президенти Владимир Путин билан телефон орқали мулоқот қилди. Бу ҳақда Трамп Truth Social ижтимоий тармоғида ёзди.

Унинг сўзларига кўра, суҳбат “яхши ва жуда самарали” бўлган. Трамп Путин билан бўлган мулоқот ҳақида бошқа деталларни очиқламаган.

Россия Президенти матбуот котиби Дмитрий Песков журналистларга Трамп ва Путин ўртасидаги телефон суҳбати бўлиб ўтганини тасдиқлаган. Унинг айтишича, суҳбат яқинда якунланган ва унинг натижалари ҳақида кейинроқ Президент ёрдамчиси Юрий Ушаков маълумот беради.

Трамп ва Путиннинг телефон орқали гаплашуви Украина томонини хавотирга солди, деб ёзди бир неча Ғарб ОАВлари. Улар АҚШ Президенти Зеленский билан учрашувидан олдин ҳам Трамп ва Путин ўртасида шунга ўхшаш суҳбат бўлиб ўтганини эслатган. Нашр суҳбатдошларидан бирининг айтишича, бу ҳолат Украинада кайфиятга салбий таъсир қилмоқда ва вазиятни янада мураккаблаштиради.

Трамп ва Путин охирги марта 16 октябрь куни, АҚШ Президентининг Зеленский билан учрашувидан бир кун олдин телефон орқали гаплашган эди. Ўша учрашувда, жумладан, Украинага узоқ масофага учувчи Tomahawk ракеталарини етказиб бериш масаласи муҳокама қилинган. CNN маълумотларига кўра, Пентагон бундай етказиб беришга рухсат беришга тайёр бўлган, аммо якуний қарор Трампга боғлиқ эди.

16 октябрдаги суҳбат чоғида Путин Tomahawk ракеталарининг Украинага берилиши жанг майдонидаги вазиятни ўзгартирмаслигини, бироқ бу Россия ва АҚШ ўртасидаги муносабатларга жиддий зарар етказишини, шунингдек, тинчлик йўлидаги истиқболларга салбий таъсир кўрсатишини таъкидлаган. Кейинчалик Трамп бу ракеталарни Киевга етказиб беришдан бош тортди.

Эслатиб ўтамиз, Украина Президенти Владимир Зеленский кеча, 28 декабрь куни Флоридада АҚШ Президенти Дональд Трамп билан бўлиб ўтадиган учрашув арафасида бир қатор Европа давлатлари раҳбарлари билан Киев ҳозир ҳаракатланаётган “дипломатик йўл” ҳамда “энг муҳим устувор вазифалар”ни муҳокама қилганди. Онлайн форматда ўтган суҳбатда Германия канцлери Фридрих Мерц, Финляндия Президенти Александр Стубб, Франция Президенти Эмманюэль Макрон, Италия Бош вазири Жоржия Мелони, Дания Бош вазири Метте Фредериксен, Польша Бош вазири Дональд Туск, Нидерландия Бош вазири Дик Схооф, Норвегия Бош вазири Йонас Гар Стёре ва Швеция Бош вазири Ульф Кристерссон иштирок этган.