Зеленский Трамп билан учрашув олдидан иттифоқчилари билан маслаҳатлашиб олди

Украина Президенти Владимир Зеленский бугун, 28 декабрь куни Флоридада АҚШ Президенти Дональд Трамп билан бўлиб ўтадиган учрашув арафасида бир қатор Европа давлатлари раҳбарлари билан Киев ҳозир ҳаракатланаётган “дипломатик йўл” ҳамда “энг муҳим устувор вазифалар”ни муҳокама қилди. Бу ҳақда Зеленский кеча, 27 декабрь куни кечқурун ўзининг Telegram-каналида хабар берди.

Онлайн форматда ўтган суҳбатда Германия канцлери Фридрих Мерц, Финляндия Президенти Александр Стубб, Франция Президенти Эмманюэль Макрон, Италия Бош вазири Жоржия Мелони, Дания Бош вазири Метте Фредериксен, Польша Бош вазири Дональд Туск, Нидерландия Бош вазири Дик Схооф, Норвегия Бош вазири Йонас Гар Стёре ва Швеция Бош вазири Ульф Кристерссон иштирок этди.

Шунингдек, мулоқотга Канада Бош вазири Марк Карни, НАТО Бош котиби Марк Рютте, Европа Кенгаши раиси Антониу Кошта ҳамда Европа комиссияси раиси Урсула фон дер Ляйен ҳам қўшилди. Украина раҳбари барчаларига “мувофиқлашув ва қўллаб-қувватлов” учун миннатдорлик билдирди ва Трамп билан учрашувдан кейин мулоқотни давом эттиришга ваъда берди.

“Путин манипуляция қила олмаслиги ва урушни ҳақиқий ҳамда адолатли якунлашдан қочиб кетолмаслиги учун ҳам фронтда, ҳам дипломатияда кучли позициялар керак”, деб ёзди Владимир Зеленский.

Шу орада 28 декабрь куни Украинадаги урушни тугатишнинг эҳтимолий шартларини муҳокама қилишга бағишланган Владимир Зеленский ва Дональд Трамп учрашуви маҳаллий вақт билан соат 15:00 дан 13:00 га кўчирилди. Бу ҳақда Оқ уй матбуот хизмати хабар қилди, бироқ кўчириш сабаби айтилмади.

Трамп Зеленскийни Палм-Бич курорт шаҳрида жойлашган ўз резиденцияси – Мар-а-Лагода қабул қилмоқчи. Украинадаги “Суспiльне. Новини” онлайн нашри маълумотларига кўра, Украина Президенти 27 декабрь кечқурун АҚШга етиб келган.