112 давлат БМТнинг Ҳормуз бўйича резолюциясини қўллаб-қувватлади

Ҳормуз бўғози бўйича Баҳрайн бошчилигидаги Бирлашган Миллатлар Ташкилотининг Хавфсизлик кенгаши резолюциясини 112 та давлат қўллаб-қувватлади. Бу ҳақда дипломатик манбаларга таяниб, “Al Jazeera” хабар берди.

Баҳрайн ва Америка Қўшма Штатлари томонидан киритилган резолюция Ҳормуз бўғози орқали эркин кемачилик ҳаракатини таъминлаш ва Эроннинг Форс кўрфазидаги қўшни давлатларга қарши ҳужумларини зудлик билан тўхтатишга чақирган. Унда халқаро сув йўллари, тижорат кемалари ва энергия таъминотини ҳимоя қилиш, шунингдек денгизчилар хавфсизлигини таъминлаш кўзда тутилган. Манбаларга кўра, ҳужжат Эроннинг Форс кўрфазидаги қўшни давлатларга қарши ҳужумларини тўхтатишни ҳам талаб қилади.

Резолюцияда Қатар, Саудия Арабистони ва Қувайт Манама ва Вашингтон билан бирга асосий ҳаммуаллифлар сифатида қатнашган. Шунингдек, Ҳиндистон, Япония, Жанубий Корея, Кения, Аргентина ва Европа Иттифоқига аъзо давлатларнинг катта қисми ҳам резолюцияни қўллаб-қувватлаган. Ҳозирча овоз бериш санаси белгиланмаган.

“Рўйхат уч тўлиқ саҳифани эгаллаган. Аслида, БМТга аъзо 193 давлатнинг қарийб учдан икки қисми бу резолюцияни ҳаммуаллиф сифатида қўллаб-қувватлаяпти”, дейди “Al Jazeera”нинг Нью-Йоркдаги мухбири Габриэль Элизондо.

Маълумот учун, бу Баҳрайн томонидан Хавфсизлик кенгашига киритилган иккинчи шундай резолюция ҳисобланади. Ўтган ой тақдим этилган биринчи резолюция Хитой ва Россия томонидан вето қилинган эди. Ҳар икки давлат янги лойиҳа бўйича ҳам эҳтиёткор муносабат билдирган, аммо овозга қўйилса, икки мамлакат яна вето қўллайдими-йўқми, ҳозирча номаълум.

Эслатиб ўтамиз, аввалроқ Эрон АҚШ билан музокараларнинг иккинчи босқичини бошлаш учун Вашингтон бешта талабни бажариши шартлигини билдирган эди.

Ойбек Рустамов