1 апрелдан боғча пули 15 фоизга ошиши мумкин

Жамият 6224
image

Ўзбекистон Республикаси Вазирлар Маҳкамасининг “2021 йил учун давлат мактабгача таълим ташкилотларида болалар таъминоти учун ота-оналар тўлови миқдорларини тасдиқлаш тўғрисида”ги қарори лойиҳаси эълон қилинди.

Қарор лойиҳасида 2021 йил учун давлат мактабгача таълим ташкилотларида болалар таъминоти учун ота-оналар тўлови миқдорларини тасдиқлаш назарда тутилмоқда.

Қайд этилишича, амалда давлат мактабгача таълим ташкилотларига ота-оналар тўловидан тушган маблағлар тўлиқлигича болани овқатлантириш харажатларига йўналтириб келинмоқда.

“2021 йил учун Ўзбекистон Республикасининг Давлат бюджети тўғрисида” қонунга асосан 2021 йилда истеъмол нархлари индекси 9-10 фоиз миқдорда бўлиши прогноз қилинган.

Шунга кўра, қарор лойиҳасида давлат мактабгача таълим ташкилотларида болалар таъминоти учун ота-оналар тўлови миқдорларини 2021 йилнинг 1 апрелидан бошлаб ўртача 15 фоизга ошириш кўзда тутилган.

Навоий вилоятининг Нурота тумани ҳамда Сурхондарё вилоятининг Қизириқ тумани ҳудудида жойлашган давлат мактабгача таълим ташкилотларида бугунги кунга қадар икки баравар камайтирилган миқдорда ота-оналар тўлови тўлаб келинмоқда.

Эндилидка қарор лойиҳасида Навоий вилоятининг Ғозғон шаҳри ва Сурхондарё вилоятининг Бандихон туманларида жойлашган давлат мактабгача таълим ташкилотларида ота-оналар тўлови миқдорлари икки баравар камайтирилган ҳолда белгиланиши назарда тутилмоқда.

Суннатилла Абдуллаев
Мақолага баҳо беринг
Баҳолаганлар: 171
Рейтинг: 3
t
×