Татьяна Каримова турмуш ўртоғининг ҳокимият тепасига келиши билан боғлиқ хотираларни ёдга олди

Жамият

image

Аввалроқ, жорий йилнинг 29-30 апрель кунлари Самарқанд шаҳрида Ислом Каримов маърифий ўқишлари анжумани бўлиб ўтгани ҳақида хабар берган эдик. 

“Каримов маърифий ўқишлари: Ислом Каримов – мустақил давлат асосчиси” деб номланган республика илмий анжумани Биринчи Президент номидаги ёдгорлик мажмуаси ва Каримов Фонди томонидан, Самарқанд вилоят ҳокимлиги ҳамда Самарқанд давлат университети кўмагида ташкил этилди. Анжуманда тарихчи, сиёсатшунос, журналист ҳамда илмий доира вакиллари жам бўлди.  Унда Ўзбекистон Республикасининг Биринчи Президенти Ислом Каримовнинг рафиқаси Татьяна Акбаровна Каримова ҳам иштирок этиб, нутқ сўзлади. 

“Ўзбекистон суверенитети ва мустақиллигини сақлаш ҳамда мустаҳкамлаш Президент Ислом Каримовнинг ҳамиша юксак маслаги саналган ва сиёсатининг асосий тамойилига айланган”, деди Татьяна Каримова анжумандаги сўзида. 

“Ўзбекистоннинг янги тарихи, жумладан, мамлакатнинг мустақилликка эришиши Ислом Каримовнинг ҳаёти, фаолияти ҳамда мероси билан чамбарчас боғлиқдир. Унинг юксак давлатчилик тафаккури, келажак қадамларни олдиндан хисоблаб чиқиш салоҳияти Ўзбекистонда ҳам, хорижда ҳам муносиб эътироф этилган. 

Ислом Каримов жуда мураккаб ва ўта зиддиятли даврда давлат тепасига келди. Ўша вақтда республика фуқаролар уруши, миллатлар ва конфессиялар ўртасидаги тўқнашув ёқасида турган эди. Таъбир жоиз бўлса, ўлка аланга ичида қолган, айрим жойларда қон ҳам тўкилган эди.  Ўзбекистон учун мамлакатни юзага келган бошбошдоқликдан олиб чиқиб кета оладиган етакчи жуда ҳам зарур эди. Ана шу паллада Ислом  Каримов залворли масъулиятни жасорат ила ўз зиммасига олди.

Каримов раҳбарлигида миллий ғурур ва халқнинг қадр-қиммати, унинг бой тарихи, маданияти ҳамда маънавий қадриятлари тикланди. Президент Каримов кўп бора таъкидлаганидек, ягона мақсад ва ғояга эга бўлмаган жамият ҳалокатга маҳкумдир, у ҳам ички, ҳам ташқи душманлар қўлида ўйинчоққа айланади. Миллий истиқлол мафкураси эса инсонларни мамлакат мустақиллигини мустаҳкамлаш, Ватан тараққиёти ва халқ фаровонлигини таъминлаш каби эзгу мақсадлар йўлида бирлаштиради”, дейди Татьяна Каримова.

Маърифий тадбирда Ўзбекистон ижтимоий-иқтисодий ва сиёсий ҳаётини такомиллаштириш, жамиятни модернизациялаш, бозор иқтисодиётини шакллантириш, тарихий-меъморий меросни асраб-авайлаш ҳамда Ўрта Осиё мутафаккирлари меросини ўрганишда Ислом Каримовнинг ўрни каби мавзуларда маърузалар тингланди. 
Анжуманда Каримов маърифий ўқишлари бундан буён анъана тарзда ҳар йили баҳорда Ислом Каримовнинг киндик қони тўкилган шаҳар – Самарқандда ўтказилиши маълум қилинди.


Мақола муаллифи

Теглар

Ислом Каримов хотираси Татьяна Каримова

Баҳолаганлар

126

Рейтинг

4

Мақолага баҳо беринг

Дўстларингиз билан улашинг