Ҳиндистон заводлари Россия нефтини сотиб олишни тўхтатди – “Bloomberg”

north_east

Хитой компаниялари Россия нефтини харид қилишни тўхтатди

АҚШнинг Россияга қарши санкцияларидан кейин Ҳиндистоннинг нефтни қайта ишлаш заводлари Россиянинг Urals маркали нефтини сотиб олишни тўхтатиб, кутиш режимига ўтди. Бу ҳақда “Bloomberg” хабар берди.

Нашрга кўра, гап Indian Oil Corp., Bharat Petroleum Corp. ва Hindustan Petroleum Corp. каби компаниялар ҳақида кетмоқда. Заводларнинг юқори лавозимли раҳбарлари айтишича, улар ҳукуматдан кўрсатмалар кутмоқда ва муқобил вариантларни баҳоламоқда.

“Bloomberg”нинг ёзишича, сўнгги санкциялар киритилишидан олдин Россиянинг ESPO маркали нефти нархи баррели учун бир доллардан кўпроқ юқори бўлган. Савдода иштирок этаётган трейдерлар маълумотига кўра, Россиянинг Узоқ Шарқидан етказиладиган ушбу маркадаги нефть ICE Brent эталон маркасига нисбатан 50 фоизлик чегирма билан таклиф қилинган.

“Россия нефтининг нархи пасайган, чунки Ғарб санкциялари туфайли Хитойнинг айрим нефтни қайта ишлаш компаниялари харидларни бекор қилишга мажбур бўлган”, дейилади хабарда.

Эслатиб ўтамиз, жорий йилнинг 22 октябрь куни АҚШ “Роснефть”, “Лукойл” ва уларнинг шуъба корхоналарига нисбатан санкциялар жорий қилганди. АҚШ Молия вазирлиги бу чораларга “Россиянинг тинчлик жараёнига жиддий қизиқиш билдирмагани” сабаб бўлганини айтган ва иттифоқчиларни ҳам шундай йўл тутишга чақирган.

Жорий йилнинг август бошида АҚШ Президенти Дональд Трамп Ҳиндистонга нисбатан бож ставкаларини 50 фоизгача оширган, бунга сабаб сифатида “Ҳиндистон ҳукумати ҳозирда тўғридан тўғри ёки билвосита Россиядан нефть импорт қилаётгани”ни кўрсатганди. Октябрь ўрталарида эса Трамп Ҳиндистон Бош вазири Нарендра Моди “Ҳиндистон энди Россия нефтини харид қилмайди” деб ваъда берганини билдирганди. Бироқ кейинроқ, Ҳиндистон Ташқи ишлар вазирлиги Дональд Трамп ва Нарендра Моди ўртасида телефон орқали мулоқот бўлганини билмаслигини айтди.