Ҳакам бир ўйинда 53 та қизил карточка кўрсатди (видео)

Бразилиянинг U-20 ёшлар чемпионати иккинчи дивизиони ярим финалида “Уберландия” ва “Маморе” жамоалари ўртасидаги учрашувда ҳакам 53 та қизил карточка кўрсатди. Бу ҳақда “CNN Brasil” хабар берди.

Жорий йилнинг 1 ноябрь куни Уберландия шаҳрида ўтказилган баҳс 3:1 ҳисобида “Маморе” фойдасига якунланган. Хабарга кўра, “Маморе”нинг учинчи голидан кейин жамоа футболчиси Дави рақибларга нисбатан провокацион ишоралар қилиб, уларни ҳақоратлаган. Шундан сўнг, майдонда оммавий муштлашув бошланган.

Оқибатда “Уберландия”нинг 24 нафар, “Маморе”нинг эса 29 нафар футболчиси қизил карточка билан майдондан четлатилган. Шунингдек, мураббийлар штаби ва жамоа расмийларининг бир нечта вакили ҳам жазоланган.

Ҳакам ўз ҳисоботида оммавий муштлашув иккинчи бўлимнинг 54-дақиқасида бошланганини қайд этган. Унинг таъкидлашича, тартибсизликлар сабабли қизил карточкаларни кўрсатиш ва учрашувни белгиланган тартибда якунлаш имкони бўлмаган. Шу боис у хавфсизлик чоралари таъминланмагани сабабли баҳсни тўхтатишга қарор қилган. Муштлашув вақтида футболчилар бир-бирларини муштлаган, тепган ва футболчилар ҳамда мураббийлар штаби аъзоларига турли буюмларни отган.

Мазкур учрашувда кўрсатилган 53 та қизил карточка футбол тарихидаги энг юқори кўрсаткич сифатида қайд этилди. Аввалги рекорд 2011 йил 27 февралда Аргентина бешинчи дивизионида “Клейпол” ва “Викториано Аренас” жамоалари ўртасидаги баҳсда ўрнатилган. Ўшанда ҳакам 36 та қизил карточка кўрсатган эди.