Londonda Starmer partiyasi va Isroilga qarshi namoyishlar avj oldi (video)

London markazida o‘n minglab odamlar ikki alohida namoyish – Nakba Day’dan bir kun o‘tib o‘tkazilayotgan Falastin tarafdorlari marshi va Tommi Robinson boshchiligidagi o‘ngchilar mitingida ishtirok etmoqda. Bu haqda “The Guardian” nashri xabar qildi.

Buyuk Britaniya poytaxti politsiyasi bugun, 16 may kuni 4 ming nafar politsiya xodimini, jumladan, shahar tashqarisidan keltirilgan kuchlarni ham jalb qilgan va buni “so‘nggi yillardagi eng yirik jamoat tartibi operatsiyasi” deb atagan. London politsiyasi ma’lumotiga ko‘ra, namoyishlarni nazorat qilish uchun bronetexnika, otlar, xizmat itlari, dronlar va vertolyotlar ham safarbar etilgan.

Har ikki namoyish marshi boshlanganidan ko‘p o‘tmay politsiya turli huquqbuzarliklar bo‘yicha 11 kishini hibsga olganini bildirgan. Avvalroq politsiya kamida 80 ming kishi qatnashishini taxmin qilgan. Robinsonning “Unite the Kingdom” marshiga 50 ming, Nakba Day namoyishiga esa 30 ming kishi borishi kutilgan.

Hokimiyat ikki namoyish qatnashchilarini bir-biridan uzoqroq saqlash maqsadida marshrut va vaqt bo‘yicha turli cheklovlar joriy qilgan. Prokurorlarga ayrim plakatlar yoki shiorlar jinoyat sifatida baholanishi va tajovuzkorlikni kuchaytirishi mumkinligini hisobga olish topshirilgan.

Politsiya operatsiya uchun 4,5 million funt sterling (6 million dollar) sarflanishini taxmin qilmoqda va “nol toqat” siyosati qo‘llanilishini bildirgan.

“Ko‘chalarimizda tartibsizlik chiqarish, kimnidir qo‘rqitish yoki tahdid qilishni maqsad qilgan har qanday shaxs qonunning butun kuchi bilan to‘qnash keladi”, degan edi Bosh vazir Kir Starmer namoyishlar arafasida.

Ma’lumot uchun, Nakba Day – falastinliklar tomonidan har yili nishonlanadigan xotira kuni bo‘lib, 1948 yilda Isroil davlati tuzilgan paytda yuz bergan ommaviy ko‘chirish va qochqinlikni eslash uchun o‘tkaziladi. “Nakba” arabcha “fojia” degan ma’noni anglatadi. Stand Up to Racism guruhi o‘zining antifashistik marshi bilan Falastin tarafdorlari tadbirini birlashtirgandi

Eslatib o‘tamiz, avvalroq Buyuk Britaniya Bosh vaziri Kir Starmer boshchiligidagi Leyboristlar partiyasi mamlakatdagi so‘nggi mahalliy saylovlarda mag‘lubiyatga uchragach, partiya ichida Bosh vazirni iste’foga chiqarish talablari kuchaygan edi.