Сергей Фомин ATP рейтингида 69 поғона юқорилади

Бугун, 4 май куни Профессионал теннисчилар ассоциацияси (ATP) ҳафталик рейтинги янгиланди. Унда Ўзбекистоннинг биринчи ракеткаси Сергей Фомин 69 поғонага юқорилади.

Сергей Фоминнинг бу натижасига асосий сабаб жорий йилнинг 19 апрель санасидан 25 апрель кунига қадар бўлиб ўтган Қозоғистонинг Чимкент шаридаги “Челленжер” турниридаги чемпионлик бўлди. Ушбу чемпионлик Фоминга 44 очко тақдим этди. Шу тариқа, Ўзбекистонинг биринчи ракеткаси рейтинг очколарини 183 тага етказган ҳолда 290-поғонага кўтарилиб олди. Бу унинг фаолиятидаги энг юқори ўрин ҳисобланади. 

ATP рейтингининг биринчи ўрнида яқиндагина “Мадрид Мастерс” турнири чемпионлигини қўлга киритган Янник Синнер бормоқда. Кучли учликдан испаниялик Карлос Алькарас ва германиялик Александр Зверев жой олган. 

Эслатиб ўтамиз, аввалроқ Янник Синнер “Мадрид Мастерс” турнирида чемпионлиги орқали теннис тарихида кетма-кет бешта ATP Мастерс турнирида ғалаба қозонган илк теннисчига айлангани ҳақида хабар берилганди.