$20 минг можароси: ўзбекистонлик аёл Туркияда сўроққа олиб кетилди (видео)

Аввалроқ, туркиялик эркак ўзбекистонлик аёл томонидан 20 минг долларга алдаб кетилганини айтган эди. Кейинчалик аёл бу иддаони рад қилиб, ундан бу миқдордаги пулни олмаганини билдирди. Кеча, 23 апрель куни бу ва бунга ўхшаш бошқа мурожаатлар юзасидан Истанбул полицияси Г. ни суриштирув ўтказиш учун олиб кетди. Бу ҳақда “ATV” телеканали хабар қилди.  

Маълум бўлишича, туркиялик Ражаб Ўндер Г. учун 8 972 доллар (402 558 турк лираси) сарфлаган. Г. бу маблағни ойига 400 доллардан қайтаришини маълум қилган.

“Менинг ҳам оилам, болаларим бор. Ойлик тўловларим бор. Бироз кўпроқ ишлаб бўлса ҳам, ойига 400 доллардан кўп беролмайман”, дейди аёл.

Шунингдек, Г. ҳақида яна бошқа даъволар ўртага чиққан. Туркиялик бошқа бир аёлнинг иддао қилишича, турмуш ўртоғи Г. га 160 минг лирага яқин маблағ юборган. Бундан ташқари, аёл эри унинг тиллаларини, уйдаги 14 дона эчки ва 4 дона улоқчани ҳам Г. учун сарфлаганини қўшимча қилган.

Бунга ўхшаш иддаолар билан бошқа фуқаролар ҳам мурожаат қилгач, Истанбул полицияси суриштирув ўтказиш учун Г. ни олиб кетган.

Эслатиб ўтамиз, аввалроқ Туркиянинг Баликесир вилоятидан 46 ёшли Дилафрўз Чўлиеванинг жасади топилиб, Ўзбекистонга қайтарилганди. Мазкур жиноятни содир этишда гумонланиб 4 нафар шахс қўлга олинган бўлиб, ҳозирги вақтда тергов ҳаракатлари давом этмоқда. 

Шунингдек, олдинроқ Туркиянинг Истанбул шаҳри Шишли туманида чиқинди йиғувчи томонидан ахлат контейнеридан ўзбекистонлик Дурдона Ҳакимованинг жасади топилган эди.

Кейинроқ мазкур иш доирасида у ўлдирилган Умрониядаги уйда яна бир ўзбекистонлик аёл – Сайёра Эргашалиева ҳам бўлаклаб ўлдирилгани аниқланди.

Бундан ташқари, Туркиянинг Истанбул шаҳрида ўзбекистонлик аёл озарбайжонлик шахс тарафидан жинсий зўравонликка учраганди. 

Туркиянинг Истанбул вилояти Молтепа туманида 2019 йилда йўқолган деб қидирувга берилган ўзбекистонлик аёл эри томонидан ўлдирилиб, чиқиндига ташлангани аниқланганди. 

Қолаверса, Туркиянинг Бодрум шаҳрида Ўзбекистон фуқароси бўлган 36 ёшли M.С. уйига кетиш учун минган автомобилда икки эркакнинг жинсий тажовузига учраганди.