“Мени тунги клубда ишлашга ундади”. Ўзбекистонлик аёл туркиялик эркакдан $20 минг олмаганини айтди (видео)

Аввалроқ, туркиялик Ражаб Ўндер исмли 56 ёшли эркак ўзбекистонлик Г. исмли 36 ёшли аёл ундан 20 минг долларни алдов йўли билан олганини иддао қилган эди. Аёл бу айбловларни инкор қилиб, эркак пул берган бўлса ҳам буни ўз хоҳиши билан қилганини айтди. Бу ҳақда у “ATV” телеканалига берган интервьюсида сўз очди.

Аёлнинг сўзларига кўра, у истамаса ҳам эркак ўз хоҳиши билан ёрдам учун пул юборган.

“2023 йилда Туркияга келдим ва Ражабнинг таксисига чиқдим. “Бунчалик гўзал аёл экансан, рақамимни ол, такси лозим бўлганида чақирасан”, дея рақамини берганди. Мен ҳам ўз рақамимни бергандим… Ўзи таксичилик қилади. Қаердан топган экан 20 минг долларни? Ундан бунча пул олмадим. Менга бир тийин пулинг керак эмас, менга ҳам, опамга ҳам юборма, дегандим. Бироқ у ўзим юборяпман, дея 1000-1500 доллар юборди. Берган пулларини майда-майда қилиб қайта сўрарди, ўша пайтлар ҳаётимдан чиқиб кет дея берган пулини юзига улоқтирганман”, деган Г.

Аёлнинг сўзларига кўра, у Ражабга кўнгил қўйган. Бироқ кейинчалик боласидан сўккани, қўпол муносабатда бўлгани учун алоқасини узган.

“Менга бошида кел, мен билан яша деди. Уни яқиндан таниш учун 1-2 ой гаплашдим, бироқ у сал бошқачароқ инсон экан. Шундан сўнг, унга бирга яшай олмаслигимни айтдим. Аввалига севгандим, бироқ севганимга пушаймон бўлдим – болаларимни сўкарди, болаларингни ўлигини кўр, қон қуссин, дея ёмон гаплар эшитдим ундан. Оғир ботарди”, дейди аёл.

Г. нинг сўзларига кўра, Ражаб унга тунги кўнгилочар марказларда ишлашни таклиф қилган ва ҳатто бир дўстидан шундай ишларни суриштириб берган.

“Олдин оёқ кийим фабрикасида, кейин текстилда ҳам ишладим. Ҳозир уй тозаловчи бўлиб ишлаяпман. Ўзи менга айтди: мен билан оила қур, хоҳласанг ID-карта (биометрик ҳужжат) олгин деди. Мени тунги кўнгилочар марказларда ишлатишини айтди. Ҳатто бир таниш дўстидан иш сўраб, гаплашди. Ишинг ҳам, пулинг ҳам керак эмас дедим”, деган аёл.

Шунингдек, аёл Ражаб Ўндер уни бошқалардан алдов йўли билан пул олишга ҳам ундаганини айтган.

“Ражаб менга TikTok’дан бойвачча биттасини топиб, пулини ўғирлаб, менинг ёнимга кел, орқангда ўзим туриб бераман, деди. Мен унинг бу гапларига йўқ дедим. TikTok’га чиқишим мумкин, лекин бировнинг пулида кўзим йўқ, дея қабул қилмадим”, деб унга қарши чиққан.

Шунингдек, аёл Ражаб Ўндернинг уй сотиб олгани ҳақида иддао қилганидек, Ўзбекистонда уйи йўқлигини, ҳеч қандай уй сотиб олмаганини қўшимча қилган. Г. эркак баъзида унинг тинчини бузиб, уруш-жанжал ҳам чиқарганини маълум қилган.

“Унинг жанжаллари сабабли ижарадаги дўстларим мени уйдан чиқарди, кўчада қолдим. Ҳозир унинг ҳаётида бир аёл бор. Уйида бирга яшайди. Уларнинг фотосуратини бир дўсти юборди, ҳатто ўзи ҳам юборган”, дейди Г.

Ўндер аёлга турмуш қуришни, ID-карта олишни, ҳатто Туркия фуқаролигини олгач, хоҳласа ажрашишини билдирган.

“Мен ундан пул сўрамадим, чўнтагидан ўғирламадим, бошига тўппонча тираб ҳам олмадим. Сенга ёрдам бераман, дея ўзи юборди. Оила қуриб, менга ID-карта олишни, 3-4 йилдан кейин эса Туркия фуқаролигини олишни таклиф қилди. Шундан кейин хоҳласанг ажрашгин деди”, дейди Г.