АҚШ ва Исроил ҳужумида қанча эронлик ҳалок бўлгани айтилди

Жорий йилнинг 28 февраь куни АҚШ ва Исроилнинг Эронга қарши ҳарбий операцияси бошланганидан буён республикада 3 мингдан ортиқ киши ҳалок бўлган. Бу ҳақда бугун, 9 апрель куни Эрон суд тиббиёти ташкилоти раҳбари Аббос Масжеди Ораний “Mizan”га берган интервьюсида маълум қилди.

“Жасадларнинг тахминан 40 фоизини шахсини аниқлашнинг имкони бўлмади”, дейди Ораний. 

Унинг қайд этишича, ҳозирда деярли барча ҳалок бўлганларнинг шахси аниқланган ва оилаларига топширилган.

Маълумот учун, жорий йилнинг 30 март куни Қизил Ярим Ой жамияти АҚШ ва Исроилнинг Эронга қарши ҳарбий операцияси бошланганидан бери 102 мингдан ортиқ фуқаролик объектлари ҳужумга учраганини хабар қилган. Ҳалок бўлганлар сони бир ҳафтадан кўпроқ вақт ичида 1,5 бараварга ошган.

Эслатиб ўтамиз, жорий йилнинг 7 апрель куни АҚШ Президенти Дональд Трамп Ҳормуз бўғозини тўлиқ ва зудлик билан очиш эвазига Эронга бериладиган зарбалар икки ҳафтага тўхтатилишини эълон қилган эди. Исроил АҚШни қўллаб-қувватлади, бироқ расмийлар ўт очишни тўхтатиш режими Ливанга тааллуқли эмаслигини қайд этди. Ўша куни Исроил мудофаа армияси (ЦАХАЛ) ҳарбий операция бошланганидан бери Ливандаги “Ҳизбуллоҳ” инфратузилмасига қарши энг йирик ҳужум якунланганини маълум қилди. Қўшма Штатлар ҳам Ливан ўт очишни тўхтатиш келишувига кирмаслигини билдирди. Ливанга қилинган ҳужумлардан сўнг Эрон Ҳормуз бўғозини қайтадан ёпиб қўйди.