ЕИ Ғазода Трампнинг режаси амалга оширилиши учун барча чораларни кўради – Каллас

north_east

Исроил ва ҲАМАС нималарга келишиб олди?

Европа Иттифоқи Ғазо секторида ўт очишни тўхтатиш бўйича АҚШ Президенти Дональд Трампнинг режаси амалга оширилиши учун барча чораларни кўради. Бу ҳақда бугун, 9 октябрь куни Европа Иттифоқининг Ташқи ишлар ва хавфсизлик сиёсати бўйича олий вакили Кая Каллас Х ижтимоий тармоғидаги саҳифасида ёзди.

Калласнинг билдиришича, Ғазода ўт очишни тўхтатиш режасининг биринчи босқичи бўйича келишув “муҳим ютуқ”ни ифодалайди. Унинг сўзларига кўра, бу муҳим дипломатик натижа бўлиб, вайронкор ҳужумларга барҳам бериш ва барча асирларни озод этиш учун реал имконият яратади.

“Европа Иттифоқи ушбу келишувнинг амалга оширилишига тўлиқ кўмаклашади”, дейди Каллас.

Қайд этиш жоиз, бунгача Дональд Трамп Исроил ва Фаластиннинг ҲАМАС ҳаракати Ғазо секторида ўт очишни тўхтатиш режасининг биринчи босқичи бўйича келишувга эришганини билдирган эди. Ушбу сулҳ Трампнинг ўзи олдинроқ эълон қилган 20 банддан иборат режаси асосида тузилган.

Унга кўра, асирлар қисқа муддат ичида озод қилинади, Исроил қуролли кучлари эса олдиндан белгиланган чизиққа чекинади. ҲАМАС ҳам Мисрнинг Шарм ал-Шайх шаҳрида ўтган музокараларда Исроил билан келишувга эришилганини тасдиқлаган.

Эслатиб ўтамиз, аввалроқ Туркия Президенти Ражаб Тойиб Эрдўған ҲАМАС ҳаракати ва Исроил ўртасида Ғазо секторида ўт очишни тўхтатиш бўйича эришилган келишувни мамнуният қабул қилганини айтиб, ушбу сулҳ шартларига қатъий риоя этилишини диққат билан кузатишини билдирганди.