Исроил кўчманчилари фаластинлик қарияни калтаклади (видео) 

Кеча, 8 январь куни Исроил томонидан босиб олинган Ғарбий Соҳилда ниқобланган, қуролланган эркаклар маҳаллий фаластинликларга ҳужум уюштириб, 67 ёшли қарияни шафқатсизларча калтаклаган. Бу ҳақда “Associated Press” хабар берди.  

Ҳужумни кўрган икки нафар шахснинг сўзларига ва “Associated Press” қўлга киритган видео тасвирларга кўра, қуролланган Исроил фуқаролари Ғарбий Соҳил шимолидаги Деир Шараф қишлоғида жойлашган ўсимликлар питомнигига ҳужум қилган. Ишчилар босқиндан хабар топиб, қочиб кетган, бироқ 67 ёшли Басим Солиҳ Ёсин кар бўлгани учун огоҳлантиришни эшитмаган ва кетишга улгурмаган. Оқибатда Ёсин қаттиқ калтакланган. Гувоҳ фаластинликлар исроилликларнинг тазйиқидан қўрқиб, исмларини ошкор қилмаслик шарти билан гапирган. 

Уларнинг айтишича, Ёсин ҳозир шифохонада, унинг қўл суяклари синган, шунингдек юз, кўкрак ва бел қисмидан жароҳатлар олган. Питомник ҳудудида тўртта автомобиль ёқиб юборилган ва бутунлай яроқсиз ҳолга келган. 

Мазкур ҳужум Ғарбий Соҳилда Исроил фуқаролари томонидан содир этилаётган зўравонликларнинг сўнгги ҳолатларидан биридир. Бундай ҳужумлар октябрь ва ноябрь ойларидаги фаластинликларнинг зайтун терими мавсумида кескин кўпайган ва шундан бери давом этиб келмоқда. 

Исроил армиясининг маълум қилишича, ҳужум ҳақида хабар келиб тушгач, Шавей Шомрон чорраҳасига (воқеага яқин ҳудуд) аскарлар юборилган. Армия ўнлаб ниқобланган исроилликлар мулкка зарар етказаётганини билдириб, уч нафар гумонланувчини қўлга олганини ва полицияга топширилганини маълум қилган. 

Питомник эгаларидан бирининг айтишича, бу объект сўнгги бир йил ичида учинчи марта ҳужумга учрамоқда. Аввалги ҳужум 2025 йил сентябрь ойида содир бўлган ва офислар ҳамда иншоотлар шикастланиши оқибатида бизнесга 600 минг доллардан ортиқ зарар етган. 

Эслатиб ўтамиз, 2025 йил 21 декабрда Исроил ҳукумати Ғарбий Соҳилда яна 19 та яҳудий аҳоли пункти қурилишини тасдиқлаган эди.