Зеленский Трампни Россияга нисбатан “аниқ позицияни эгаллашга” чақирди

АҚШ Президенти Дональд Трамп келаси ҳафта Нью-Йоркда Украина етакчиси Владимир Зеленский билан учрашиши мумкин. Бу ҳақда бугун, 16 сентябрь куни Тель-Авивда АҚШ Давлат котиби Марко Рубио маълум қилди.

22-30 сентябрь кунлари Нью-Йоркда БМТ Бош Ассамблеясининг 80-сессиясининг юқори даражадаги ҳафталиги бўлиб ўтади.

“У (Трамп) урушни тугатиш учун ҳамма нарсани қилишга ҳаракат қилмоқда. Президент Путинга қайта-қайта қўнғироқ қилди, Зеленский билан қайта-қайта учрашди, шу жумладан, эҳтимол, келаси ҳафта Нью-Йоркда яна (у билан учрашиши мумкин”, деди Рубио.

Украина томони ҳозирча бундай учрашув ўтказиш имкониятини тасдиқлагани йўқ.

Зеленский эса Трампдан хавфсизлик кафолатлари бўйича “аниқ позиция” олишини кутмоқда. У “Sky News” телеканалига берган интервьюсида Трампни Россияга қарши санкциялар ва Украина учун хавфсизлик кафолатлари бўйича “аниқ позиция” олишга чақирди. Украина етакчиси Оқ уй раҳбари шахсан ўзи “қатъий чоралар” кўриши ва “Путинни ундан қўрқиши” кераклигини айтди. 

“Урушни тугатишимиздан олдин, мен барча келишувлар тузилишини жуда хоҳлайман. Мен АҚШ ва барча Европа ҳамкорлари томонидан қўллаб-қувватланадиган ҳужжатга эга бўлишни хоҳлайман. Бу жуда муҳим. Бунинг амалга ошиши учун бизга Президент Трампнинг аниқ позицияси керак”, деб таъкидлади Украина Президенти.

Зеленскийнинг фикрича, Қўшма Штатлар “ўз қарорларини қабул қилиш” учун етарли даражада кучли. 

“Мен ишонаманки, Дональд Трамп бизга ҳаво ҳужумидан мудофаа тизимларини етарли миқдорда етказиб бера олади, чунки АҚШда улар етарлича”, деди у.

Украина давлат раҳбарининг эслатишича, Европа аллақачон Россияга қарши 18 та санкция пакетини жорий қилган. Украина раҳбарининг фикрича, Америка Қўшма Штатларининг кучли чекловчи чоралар тўплами етишмаяпти.

Владимир Зеленский 15 август куни Аляскада бўлиб ўтган Трамп-Путин саммитини ҳам танқид қилди. Украина Президенти Трамп “Путинга кўп нарса берган”и ва бунинг учун Путин кўпроқ тўлаши керак”, деган фикрни билдирди.

“Ўйлайманки, агар бу уч томонлама учрашув бўлганида, биз қандайдир натижаларга эришган бўлардик”, дея қўшимча қилди сиёсатчи.

Трамп Европанинг Россияга қарши санкцияларини етарли эмас деб ҳисоблайди

Дональд Трамп 14 сентябрь куни Европа ўз чекловларини Вашингтон ҳаракатларига мос равишда кучайтирган тақдирда, Россияга нисбатан АҚШ ҳам санкцияларини кучайтиришга тайёрлигини айтди.

Бунгача АҚШ Президенти Truth Social ижтимоий тармоғида “барча НАТО давлатлари рози бўлиб, худди шундай йўл тутса, ҳамда НАТОнинг барча давлатлари Россиядан нефть сотиб олишни тўхтатса, Россияга қарши жиддий санкциялар қўйишга тайёрлиги” ҳақида мактубини эълон қилган эди.

Америка Президенти Шимолий Атлантика альянсининг баъзи аъзоларининг Россия нефтини сотиб олишини “ҳайратланарли ҳолат” деб атади ва бу НАТОнинг музокаралардаги позициясини ва алmянснинг Москвага таъсирини заифлаштиришини қўшимча қилди.

Сентябрь ойи бошида Европа етакчилари билан видеоселектор йиғилиши чоғида АҚШ Президенти уларни Россия нефтини сотиб олиш орқали Украинадаги “урушни молиялаштираётганликда” айблаб, Москвани ушбу даромад манбаидан узиб қўйишга, шунингдек, бу борада Хитойга босим ўтказишга чақирган эди.