Трамп Россия, Хитой ва КХДРни АҚШга қарши “фитна” режалаштиришда айблади

АҚШ Президенти Дональд Трамп Россия, Хитой ва КХДРни АҚШга қарши “фитна” режалаштираётганликда айблади. Бу ҳақда у бугун, 3 сентябрь куни ўзининг Truth Social’даги саҳифасида ёзди.

АҚШ Президенти Пекиндаги парадга изоҳ берар экан, Хитой Раиси Си Цзиньпин ўз нутқида: “АҚШнинг Иккинчи жаҳон урушидаги ёрдамига тўхталиб ўтадими?”, деган саволни қўйган. Трампнинг билдиришича, АҚШ Хитойга: “Бегона босқинчидан озод бўлишида ёрдам берган, кўплаб америкаликлар Хитойнинг ғалабаси ва шарафи учун жон берган”.

“Хитой Раиси Си Цзиньпин ва буюк Хитой халқининг байрами улуғвор ва унутилмас бўлсин! Илтимос, Қўшма Штатларга қарши фитна тайёрлаётганингизда Владимир Путин ва Ким Чен Инга менинг энг самимий саломимни етказинг”, деб ёзди Трамп. 

Қайд этиш жоиз, 31 августдан 1 сентябргача Тяньцзинь шаҳрида бўлиб ўтган ШҲТ саммитида Хитой раҳбари Си Цзиньпин Россия, Ҳиндистон ва бошқа мамлакатларни Ғарбга қарши чиқишга чақирганди. 

“Дунё “беқарорлик ва ўзгаришлар” даврини бошдан кечираётган бир пайтда, улар “тартибли кўп қутбли дунё”ни қўллаб-қувватлаши зарур. Бунга эркин савдони ҳимоя қилиш ва “адолатлироқ ҳамда оқилона глобал бошқарув тизими”ни шакллантириш киради”, деган Си Цзиньпин.

Халқаро матбуот эса бу баёнотни АҚШга қарши чақириқ сифатида баҳолади.

“Биз ҳамкорлик кўламини кенгайтиришимиз, ҳар бир мамлакатнинг ўзига хос кучли томонларидан тўлиқ фойдаланишимиз ва минтақавий тинчлик, барқарорлик ва фаровонликка ҳисса қўшиш бўйича умумий масъулиятни бирлаштиришимиз керак”, дейди Хитой раиси ШҲТ саммитида иштирок этган жаҳон етакчиларига.

Маълумот учун, ШҲТ саммитдан сўнг, бугун, 3 сентябрь куни Пекин шаҳрининг Тяньаньмэнь майдонида Иккинчи жаҳон урушидаги Ғалабанинг 80 йиллигига бағишланган тантанали тадбирлар бўлиб ўтди. Парадда Ўзбекистон Президенти Шавкат Мирзиёев ҳам рафиқаси билан қатнашди. Шунингдек, унда Хитой раҳбари Си Цзиньпин, Россия Президенти Владимир Путин, Шимолий Корея етакчиси Ким Чен Ин ва яна 24 давлатнинг давлат ва ҳукумат раҳбарлари иштирок этди.