Мирзиёев Хитойдаги парадда қатнашмоқда (видео)

Ўзбекистон Президенти Шавкат Мирзиёев бугун, 3 сентябрь куни рафиқаси билан бирга Пекин шаҳрининг Тяньаньмэнь майдонида ўтаётган Иккинчи жаҳон урушидаги Ғалабанинг 80 йиллигига бағишланган тантанали тадбирларда иштирок этмоқда. 

Парадда, шунингдек, Хитой раҳбари Си Цзиньпин, Россия Президенти Владимир Путин, Шимолий Корея етакчиси Ким Чен Ин, яна 24 давлатнинг давлат ва ҳукумат раҳбарлари иштирок этди.

ХХР Раиси Си Цзиньпин ўз нутқида бугунги шароитда тарихий хотирани асраб-авайлаш, тинчликни сақлаш ва адолатни таъминлаш муҳимлигини таъкидлади. Парадда Хитой халқ озодлик армиясининг 45 та бўлинмаси иштирок этди. Хитой мудофаа саноати томонидан ишлаб чиқарилган ракета тизимлари, танклар, авиация техникаси ва учувчисиз учиш аппаратларининг энг сўнгги намуналари намойиш этилди.

Бундай парадлар 1949 йилдан буён Пекинда ўтказиб келинади, қуролли кучларнинг сўнгги катта кўриги эса 2019 йил 1 октябрда бўлиб ўтган ва унда 15 мингга яқин иштирокчи қатнашган.

Ўзбекистон Республикаси Президентининг Пекин шаҳридаги тантанали тадбирларда иштироки мамлакатнинг халқлар ўртасидаги дўстлик ва ўзаро англашувни мустаҳкамлаш, тинчлик, барқарор тараққиёт ва фаровонлик йўлида минтақавий ва глобал даражада конструктив мулоқотни ривожлантиришга қаратилган изчил ташқи сиёсатининг навбатдаги тасдиғи бўлди.