Айрим ИИО ходимлари ва пенсионерларига хизмат уйлари хусусийлаштириб берилади

Эндиликда айрим тоифадаги ички ишлар органлари ходимлари ва пенсионерларига уларга берилган хизмат уй-жойлари хусусийлаштириб берилади. Бу Ўзбекистон Республикаси Вазирлар Маҳкамасининг 28 август куни қабул қилинган “Ички ишлар органлари ходимлари ва пенсионерлари ҳамда уларнинг оила аъзоларини турар жой билан таъминлаш бўйича қўшимча чора-тадбирлар тўғрисида”ги қарорида белгиланган.

Қарорга кўра, қуйидагиларга хизмат уй-жойлари хусусийлаштириб берилади:

2022 йил 4 июлга қадар ички ишлар органларида хизмат қилиб, пенсия олиш ҳуқуқини берадиган хизмат муддатини ўтаган ёки хизмат даврида орттирилган касаллик (ногиронлик) оқибатида резервга ва истеъфога бўшатилган, ўзи ва турмуш ўртоғининг номида шахсий тураржой бўлмаган пенсионерларга ёхуд вафот этган пенсионерларнинг номида шахсий тураржой бўлмаган оила аъзоларига (эри (хотини), фарзандлари ёки қарамоғида бўлган шахсларга);

вафот этган ходимларнинг оила аъзоларига (эри (хотини), фарзандлари ёки қарамоғида бўлган шахсларга), башарти уларнинг номида шахсий тураржой бўлмаса.