Туркияда ўрмон ёнғинлари ортидан қарийб 40 киши ҳибсга олинди

Туркия Президенти Ражаб Тойиб Эрдўған жорий йилги ёз мавсумидаги ўрмон ёнғинларига алоқадорликда гумонланиб қарийб 40 киши ҳибсга олинганини маълум қилди. Бу ҳақда у кеча, 28 июль куни Вазирлар Маҳкамаси йиғилиши сўнггида халққа қилган мурожаатида сўз очди.

Эрдўғаннинг айтишича, жорий йилда мамлакатда содир бўлган ўрмон ёнғинларининг 96 фоизи инсон омилига боғлиқ бўлган. У сабаблардан бири сифатида эҳтиётсизлик билан ташланган сигарет қолдиқлари, тўлиқ ўчирилмаган оловлар ва ҳатто линза вазифасини бажарган шиша парчалари каби омилларни келтирган.

Жорий йил 1 июндан бери жами 149 киши ушланган, улардан 38 нафари ҳибсга олинган, 61 киши эса суд назоратида қолмоқда. Ҳибсга олинганлардан бири аҳоли сони бўйича мамлакатда тўртинчи ўринда турувчи Бурса шаҳри яқинидаги ёнғинга алоқадорликда гумон қилинмоқда.

Шунингдек, Эрдўған Туркия ўрмон ёнғинларига қарши фаол кураш олиб бораётганини таъкидлаган. Унга кўра, 2020-2024 йиллар оралиғида Туркия Испания, Италия, Греция, Португалия, АҚШ ва Канадага қараганда камроқ ўрмон йўқотган. Шунингдек, Туркия барча Ўртаер денгизи давлатлари орасида махсус ёнғин самолётлари сони бўйича етакчи ҳисобланади.

Мамлакат бўйлаб кеча-ю-кундуз ишлаётган 27 та ёнғин самолёти, 105 та вертолёт, 6000 га яқин ер усти техникаси ва 25 минг атрофида профессионал ўт ўчирувчи сафарбар қилинган. Июннинг охиридан буён Туркияда ўрмон ёнғинлари оқибатида ҳалок бўлганлар сони 17 нафарга етган.

Эслатиб ўтамиз, аввалроқ Туркиянинг бир қанча вилоятларида аҳоли турар жойлари, қишлоқ хўжалиги ерлари ва ўрмонларни қамраб олган ёнғинлар авж олаётгани хабар қилинган эди. Шунингдек, Туркиядаги Сакарья вилоятининг Акязи туманида эркак эскирган матрасини ёқмоқчи бўлиб, ўрмонни ёқиб юборгани маълум бўлганди.