Эрдўғаннинг рафиқаси йиғлагани нега дунёда шов-шув бўлди?

Жорий йилнинг 12 июль куни Туркия Президенти Ражаб Тойиб Эрдўған Курдистон Ишчилар партияси (PKK) қуролларни ташлагач, бу ҳақда илк бор нутқ сўзлаганди. Унинг нутқи чоғида залда ҳаяжонли ва ҳиссий лаҳзалар юз берди. Нутқ якунида Президентнинг рафиқаси Эмина Эрдўған йиғлаб, минбардан тушаётган эрини қучоқлаб, унинг елкасида кўз ёш тўкди. Бу ҳақда “Cumhuriyet” хабар берди.

Эрдўған бу нутқни “Адолат ва тараққиёт” партиясининг 32-йиғилишида сўзлаган. Давлат раҳбари “Террорчиликдан холи Туркия” ғоясини илгари сурган ҳамда сиёсий ва ижтимоий жиҳатдан муҳим хабарлар берган. 

“Агар турк, курд ва араб бир бўлса – ҳамма бирлашади. Бўлинса – мағлубият, фожиа ва қайғу бизни чулғайди”, деган давлат раҳбари. 

Шунингдек, Эрдўған турк ва курд халқларининг давом этаётган биродарлик ришталарини алоҳида таъкидлаган. Бу фикрлар залда узоқ ва қизғин олқишлар билан қарши олинган.

Нутқ сўнггида эса энг таъсирли лаҳза юз берган. Тадбирда иштирок этган Эмина Эрдўған ҳаяжонни енга олмай, кўз ёш тўккан. Эрдўған саҳнадан тушгач, кўз ёшларини артаётган рафиқасига меҳр билан қучоқ очган. Бу ҳиссиётли дақиқалар эса камераларга муҳрланган.

Эмина Эрдўғаннинг йиғлаган ҳолати ижтимоий тармоқларда тез орада трендга айланган. Кўплаб фойдаланувчилар бу ҳолатни жамиятда бирлик ва бирдамлик чақириқлари қандай таъсир қилаётганини кўрсатувчи муҳим белгилар, деб изоҳлаган. Лекин баъзи оммавий ахборот воситаларида “Эрдўған янги сайловларга номзодини қўймоқчи эмаслигини айтгани учун унинг аёли бунга бардош беролмай йиғлаб юборди” талқинидаги фейк хабарлар тарқалди. Аслида эса Эрдўғаннинг аёли “Эртадан бошлаб 47 йиллик террор фожиаси тугайди”, деган сўзлар учун кўз ёш тўккан. 

Маълумот учун, Курдистон Ишчилар партияси 1978 йил 27 ноябрда чап социалистик партия сифатида ташкил этилган ва 1984 йил 15 августдан бошлаб Туркия ҳукуматига қарши қуролли урушни бошлаган. Унинг тарафдорлари Абдулла Ўжалонни олий етакчи ва мафкуравий илҳомлантирувчи деб билади.

Туркия, АҚШ, Европа Иттифоқи ва айрим бошқа давлатлар PKKʼни террорчи ташкилот деб тан олган.

Абдулла Ўжалон 1999 йилдан бери Имрали оролидаги қамоқхонада изоляцияда сақлаб келинмоқда. У жорий йилнинг 27 февраль куни тарихий баёнот бериб, тарафдорларини Туркияга қарши 40 йилдан ортиқ давом этган курашдан сўнг қуролларини ташлаб, PKK тарқатилганини эълон қилишга чақирди. Бу ҳаракат 40 мингдан ортиқ одамнинг ўлимига сабаб бўлган можарода тинчликка йўл очишга қаратилган эди.

Эслатиб ўтамиз, аввалроқ Курдистон Ишчилар партияси қуролли можарони тўхтатиш ва ўзини тарқатиб юборишга қарор қилгани ҳақида баёнот тарқатганди. Қолаверса, партия Шимолий Ироқда ўтказилган маросимда ўз ихтиёри билан қуролларини топширгани ва уларни рамзий тарзда ёққанини тасдиқлаганди.