PKK ўз қуролларини ёқиб ташлади

Туркияда тақиқланган Курдистон Ишчилар партияси (PKK) Шимолий Ироқда ўтказилган маросимда ўз ихтиёри билан қуролларини топширгани ва уларни рамзий тарзда ёққанини тасдиқлади. Бу ҳақда “Milliyet” хабар берди. 

Маълум қилинишича, Курдистон Ишчилар партияси ўзларининг қамоқдаги етакчиси Абдулла Ўжалон томонидан йўлланган чақириққа жавобан ушбу ҳаракатларни амалга оширган. 

“Биз бу ерга 2025 йил 19 июнь куни партия етакчиси Абдулла Ўжалон томонидан йўлланган чақириққа жавобан келдик. Бизнинг келишимиз, шунингдек, 5-7 май кунлари бўлиб ўтган партия 12-съездининг қарорлари асосида амалга оширилди. Бу ерда биз ўз қуролимизни ихтиёрий тарзда йўқ қилмоқдамиз. Умид қиламизки, бу қадам бутун халқимизга, айниқса аёллар ва ёшлар, Туркия ва Яқин Шарқ халқларига, шунингдек, бутун инсониятга фойда келтиради”, дейилади партия баёнотида. 

Қолаверса, улар барча минтақавий ва халқаро кучларни курд халқининг қонуний ва демократик ҳуқуқларини ҳурмат қилишга, тинчлик ва демократия асосида ечим топиш жараёнини қўллаб-қувватлашга чақирган.

Маълумот учун, Курдистон ишчи партияси 1978 йил 27 ноябрда чап социалистик партия сифатида ташкил этилган ва 1984 йил 15 августдан бошлаб Туркия ҳукуматига қарши қуролли урушни бошлаган. Унинг тарафдорлари Абдулла Ўжалонни олий етакчи ва мафкуравий илҳомлантирувчи деб билади.

Туркия, АҚШ, Европа Иттифоқи ва айрим бошқа давлатлар PKKʼни террорчи ташкилот деб тан олган.

Абдулла Ўжалон 1999 йилдан бери Имрали оролидаги қамоқхонада изоляцияда сақлаб келинмоқда. У жорий йилнинг 27 февраль куни тарихий баёнот бериб, тарафдорларини Туркияга қарши 40 йилдан ортиқ давом этган курашдан сўнг қуролларини ташлаб, PKK тарқатилганини эълон қилишга чақирди. Бу ҳаракат 40 мингдан ортиқ одамнинг ўлимига сабаб бўлган можарода тинчликка йўл очишга қаратилган эди.

Эслатиб ўтамиз, аввалроқ Курдистон Ишчилар партияси қуролли можарони тўхтатиш ва ўзини тарқатиб юборишга қарор қилгани ҳақида баёнот тарқатганди.