Аргентина Британияни Фолкленд бўйича муҳокамани қайта бошлашга чақирди

Аргентина Бирлашган Қиролликни Мальвин (Фолкленд) ороллари устидан суверенитет масаласини муҳокама қилишни қайта бошлашга чақирди. Бу даъват Буюк Британиянинг яқинда Чагос архипелагини Маврикийга топширгани фонида янгради. Бу ҳақда Аргентина Ташқи ишлар вазирлиги баёнот берди.

Аргентина томони Чагос масаласидаги келишувни “низоларни тинч йўл билан ҳал қилиш мумкинлигини кўрсатувчи мисол” деб атаган ва бу воқеани “деколонизация жараёнида тарихий аҳамиятга эга ҳодиса” сифатида баҳолаган.

Маълумот учун, жорий йилнинг 22 май куни Буюк Британия Бош вазири Кир Стармер Маврикий билан Ҳинд океанининг марказида жойлашган Чагос ороллари устидан суверенитетни ўтказишга доир келишув имзоланганини маълум қилди. Бироқ бу ороллардаги Диего-Гарсия оролида жойлашган Британия-Америка ҳарбий базаси ўз фаолиятини давом эттиради.

Мальвин (Фолкленд) ороллари Жануби-ғарбий Атлантика океанида жойлашган бўлиб, 2 асрдан буён Аргентина ва Буюк Британия ўртасида баҳсли ҳудуд бўлиб қолмоқда. 1982 йил апрель ойида бу ороллар ҳарбий можарога ҳам сабаб бўлган. Ўшанда Аргентина мағлубиятга учраган. 2013 йил март ойида оролларда ўтказилган референдумда аҳоли катта устунлик билан Буюк Британия ҳудуди мақомини сақлаб қолишни ёқлаб чиққан. Аргентина эса бу натижаларни тан олмаган.

Эслатиб ўтамиз, ўтган йили октябрь ойида Буюк Британия Ҳинд океанидаги Чагос архипелаги суверенитетини Маврикийга ўтказишга рози бўлгани хабар қилинганди. Британия ва Маврикий ҳукуматлари томонидан қўшма баёнот эълон қилинган бўлиб, ушбу келишув “ўтмишдаги хатоларни тузатишга” қаратилган ҳамда Чагос аҳолисининг фаровонлигини таъминлашга ёрдам беришни мақсад қилади.