Британия Ўзбекистондаги 4 та компанияга санкция киритди

Буюк Британия Россияга нисбатан санкциялар рўйхатини кенгайтириб, унга Ўзбекистондаги тўртта компания ва бир тадбиркорни киритди. Бу ҳақда Буюк Британия ҳукуматининг расмий сайтида эълон қилинган ҳужжатда сўз боради.

Буюк Британия санкция режимини янгилаш доирасида рўйхатга 24 та янги шахс ва ташкилотни қўшган. Барча фигурантларга мамлакат ҳудудидаги банк ҳисобварақларини музлатиш, шунингдек, қўшимча молиявий ва бизнес чекловлари жорий этилиши белгиланган.

Ҳужжатда келтирилишича, чекловлар остига Фарғона кимё заводи, Gelion Business Trade, Chemistry International, Raw Materials Cellulose компаниялари, шунингдек, Тошкентда туғилган Рустам Мўминов тушган.

Энг қатъий чоралар Фарғона кимё заводига нисбатан қўлланган. Буюк Британия расмийлари корхонанинг молиявий активларини музлатган ҳамда унга нисбатан траст (ишончли бошқарув) хизматларини кўрсатишни тақиқлаган. Лондон версиясига кўра, мазкур завод Украина суверенитетини издан чиқаришда фойдаланилиши мумкин бўлган маҳсулот ёки технологияларни етказиб берган бўлиши эҳтимоли мавжуд.

Санкциялар Тошкентда рўйхатдан ўтган Gelion Business Trade компаниясига ҳам татбиқ этилган. Ҳужжатда қайд этилишича, ушбу фирма Украинадаги вазиятни беқарорлаштиришга хизмат қилувчи товарлар етказиб беришда иштирок этган бўлиши мумкин. Худди шундай асослар билан Навоий вилоятида жойлашган Chemistry International қўшма корхонаси ҳамда Жиззах вилоятида фаолият юритаётган Raw Materials Cellulose ташкилотига нисбатан ҳам чекловлар жорий этилган.

Санкциялар рўйхатининг алоҳида банди Рустам Мўминовга бағишланган. У Тошкентда туғилган бўлиб, ҳужжатга кўра, Ўзбекистон, Исроил ва Россия паспортларига эга. Британия томони уни вазиятни беқарорлаштиришга йўналтирилган бўлиши мумкин бўлган молиявий ресурслар ёки хизматларни таъминлаганликда гумон қилмоқда.

Эслатиб ўтамиз, аввалроқ Рустам Мўминов номи Европа Иттифоқининг 19-санкциялар пакетида ҳам тилга олинган эди. ЕИ ҳужжатларида у Фарғона кимё заводининг пахта целлюлозасини Россиянинг мудофаа корхоналарига етказиб бериш билан боғлиқ бўлгани, ушбу целлюлоза у ерда порох ишлаб чиқаришда қўллангани қайд этилган. Бироқ ўшанда ҳужжатларда Мўминов Ўзбекистон, Россия ва Буюк Британия фуқаролигига эга экани кўрсатилган эди.