АҚШ Россияга қарши янги санкциялар тайёрламоқда – “Reuters”

Қўшма Штатлар Украинадаги можарони ҳал қилиш бўйича музокаралар чоғида Москвага босимни кучайтириш мақсадида Россияга қарши янги санкциялар пакетини тайёрлади. Бу ҳақда манбаларга таяниб, “Reuters” хабар берди.

Уларнинг маълумотларига кўра, янги иқтисодий санкциялар пакети банк ва энергетика соҳаларида чекловларни ўз ичига олиши мумкин.

Агентликнинг ёзишича, АҚШ Президенти Дональд Трамп Россияга қарши янги чеклов чораларини жорий этишга рози бўладими ёки йўқми, ҳозирча номаълум.

Аввалроқ АҚШ Давлат котиби Марко Рубио Америка маъмурияти Россияга қарши янги санкциялар жорий қилмаётгани, чунки у Украинадаги можарони тинч йўл билан ҳал қилиш жараёнига хавф туғдирмоқчи эмаслигини маълум қилганди.

24 апрель куни Трамп Россияга қарши санкцияларни кучайтириш имконияти ҳақидаги саволга “бир ҳафта ичида” жавоб беришни маъқул кўришини айтди.

Эслатиб ўтамиз, олдинроқ АҚШ Президенти Дональд Трампнинг махсус вакили Кит Келлогг “Fox News” телеканалига берган интервьюсида АҚШ Украинага можаронинг тугатилиши бўйича 22 та аниқ шартни тақдим этгани ва Киев уларни қабул қилганини, Украина Россия томонидан амалда назорат қилинаётган ҳудудлардан воз кечишга тайёр экани, бироқ бу юридик жиҳатдан тан олинмаслигини айтганди. 

Трампнинг ўзи эса 29 апрель куни ABC News телеканалига берган интервьюсида Россия Президенти Владимир Путин давом этаётган ҳужумларга қарамай, Украинадаги урушни тўхтатмоқчи эканини, Путин уни ҳурмат қилгани учун бутун Украинани эгалламаганини айтди. АҚШ Давлат департаменти расмий вакили Тэмми Брюс брифингда АҚШ энди Украина бўйича учрашувлар учун дунё бўйлаб “учмаслиги”ни маълум қилди.