АҚШ энди Украина бўйича учрашувлар учун дунё бўйлаб “учмайди”

АҚШ энди Украина бўйича учрашувлар учун дунё бўйлаб “учмайди”. Бу ҳақда АҚШ Давлат департаменти расмий вакили Тэмми Брюс брифингда маълум қилди.

Дипломатнинг таъкидлашича, Вашингтон Россия ва Украина ўртасидаги тинч йўл билан келишувга бўлган муносабатини ўзгартирмоқда ва энди музокараларда воситачилик қилиш учун “биринчи қўнғироқда” бутун дунё бўйлаб учмайди.

Давлат котиби Марко Рубио АҚШнинг ҳамкорлик формати ўзгаришини очиқ айтди, аммо тинчликка эришиш саъй-ҳаракатларини қўллаб-қувватлаш сақланиб қолишини таъкидлади.

“Биз энди икки томон ўртасидаги музокараларда воситачи бўлиш учун биринчи чақириқдаёқ дунё бўйлаб саёҳат қилиш ниятида эмасмиз. Ҳозир айнан улар ўзлари можарога барҳам бериш бўйича аниқ таклифларни илгари суриши ва ишлаб чиқишлари керак бўлган пайт келди. “Энди ҳаммаси уларга боғлиқ”, дея қўшимча қилди дипломат.

Шунингдек, Тэмми Брюс минерал ресурслар бўйича Вашингтон-Киев келишуви Украина миллий хавфсизлигини мустаҳкамлашини айтди. Давлат департаменти вакилининг сўзларига кўра, келишув АҚШ ва Украина ўртасидаги шерикликни, иқтисодий ҳамкорликни мустаҳкамлайди.

“Бу шунчаки молиявий келишув эмас. Бу икки давлат ўртасидаги алоқа Украина билан боғлиқ вазиятни яхши томонга ўзгартиради, бунда уларнинг [Украинанинг] дўсти бор. Америка Қўшма Штатлари каби дўстингиз бўлса ва биз сиз билан ва сизнинг мамлакатингизда иш олиб борсак, бу барча иштирокчиларнинг миллий хавфсизлигини кучайтиради”, деб давом этди Брюс.

Унинг сўзларига кўра, бу ерда гап қайта тиклаш учун Украинага қайта инвестиция қилинган фойда ҳақида кетмоқда.

Эслатиб ўтамиз, олдинроқ АҚШ Президенти Дональд Трампнинг махсус вакили Кит Келлогг “Fox News” телеканалига берган интервьюсида АҚШ Украинага можаронинг тугатилиши бўйича 22 та аниқ шартни тақдим этгани ва Киев уларни қабул қилганини, Украина Россия томонидан амалда назорат қилинаётган ҳудудлардан воз кечишга тайёр экани, бироқ бу юридик жиҳатдан тан олинмаслигини айтганди. 

Трампнинг ўзи эса 29 апрель куни ABC News телеканалига берган интервьюсида Россия Президенти Владимир Путин давом этаётган ҳужумларга қарамай, Украинадаги урушни тўхтатмоқчи эканини, Путин уни ҳурмат қилгани учун бутун Украинани эгалламаганини айтди.