“Бутун дунё бизни алдади”. АҚШ Трампнинг кимсасиз оролларга солган божларини изоҳлади

АҚШ Савдо вазири Говард Лутник Президент Дональд Трампнинг одамлар яшамайдиган, фақат пингвинлар яшайдиган оролларга солинган божларни нима учун киритганини тушунтирди. Бу ҳақда у CBS News телеканалига берган интервьюсида сўз очди.

Лутник Трамп жорий қилган божларни қўллаб, бу сиёсат АҚШ заводларини ҳимоя қилишга ва Америка Қўшма Штатларининг кучини тиклашга ёрдам беришини айтди. АҚШ Савдо вазири, шунингдек, бошқа давлатлар уларни йиллар давомида алдаганини таъкидлаб, Президент Трамп бундан кейин бунга чидаб турмаслигини билдирган.

“Бу АҚШ ўз зиммасига олган палла ва Дональд Трамп бу ҳақда бутун ҳаёти давомида гапирди. Бу Дональд Трампнинг кун тартиби ва биз ҳаммамиз шу ерда уни амалга оширишда ёрдам бериш учун йиғилдик”, деди Лутник.

Шунингдек, интервьюда Лутник Трамп томонидан жорий этилган ўзаро божлар рўйхатига одам яшамайдиган Херд ва МакДональд ороллари киритилганини изоҳлаб, бошқа мамлакатлар мазкур ҳудудлардан божларни четлаб ўтиш учун фойдаланмаслиги зарурлигини айтган. Лутникнинг сўзларига кўра, Трамп администрацияси ҳеч қандай мамлакатни рўйхатдан чиқариб ташлай олмайди, чунки бошқа мамлакатлар ушбу ҳудудни божларни четлаб ўтиш учун ишлатишлари мумкин.

“Трамп айтди: Мана, мен дунёнинг бирон бир қисми Хитой ёки бошқа давлатлар учун юк ташиш жойига айланишига рухсат бера олмайман. Шундай қилиб, у бу бемаъни бўшлиқларни йўқ қилди”, деди Лутник.

Эслатиб ўтамиз, Дональд Трамп 2 апрель куни импорт маҳсулотларига янги божлар жорий этганди. Асосий ставка бутун импорт қилинадиган маҳсулотларга нисбатан 10 фоизни ташкил этади, аммо айрим давлатлар учун бу тарифлар анча юқори белгиланган. Масалан, Хитой учун 34%, Вьетнам учун 46%, Европа Иттифоқи давлатлари учун 20%. Россия ва Беларусга нисбатан божлар жорий этилмаган.

Қизиқ томони шундаки, Дональд Трамп ҳатто ҳеч ким яшамайдиган Херд ва МакДональд оролларига ҳам 10 фоизлик бож қўйди. Ушбу оролларнинг аҳолиси 0 киши, бироқ у ерда пингвинларнинг улкан популяцияси жойлашган. Дунёдаги энг олис қуруқлик жойлашган ҳудуд Ҳинд океанининг жанубий қисмида бўлиб, Херд ва МакДональд оролларидан иборат. Улар Австралиянинг ташқи ҳудудлари ҳисобланади.