Трамп Украинага бормоқчи эмас

АҚШ Президенти Дональд Трамп Украинага ташриф буюришни режалаштирмаяпти. Бу ҳақда  кеча, 15 апрель куни Оқ уй матбуот котиби Кэролайн Ливитт матбуот учун брифингда сўз очди.

Унинг сўзларига кўра, Оқ уйда ҳали бу ҳақда ҳеч қандай гап бўлгани йўқ.

“Мен Президент билан бу ҳақда гаплашмаганман, у Зеленскийнинг таклифини кўрган-кўрмаганини билмайман. Ундан сўрашим мумкин. Менда Украинага ташриф буюриш режалари ҳақида маълумот йўқлиги аниқ”, деган у ўз нутқида.

Маълумот учун, оммавий ахборот воситаларининг бирига берган интервьюсида Владимир Зеленский Дональд Трампни Украинага ташриф буюришга ва Россия зарбалари натижасида юзага келган вайронагарчиликни ўз кўзлари билан кўришга чақирганди.

“Илтимос, бирон бир қарор қабул қилишдан, музокаралар олиб боришдан олдин келиб, одамлар, тинч аҳоли, аскарлар, шифохоналар, черковлар, болаларни кўринг”, деган эди Зеленский.

Эслатиб ўтамиз, аввалроқ Қўшма Штатлар Президенти Дональд Трамп Овал кабинетида Сальвадор Президенти Найиб Букеле билан бўлган суҳбатда Россия Президенти Владимир Путин, Оқ уйнинг собиқ раҳбари Жо Байден ва Украина Президенти Владимир Зеленский Украинада ҳарбий ҳаракатлар бошланишида айбдор эканини айтганди.