Дубл қайд этганимда яхшироқ бўларди – Шомуродов

“Рома” ва “Ювентус” ўртасидаги А Серия 31-туридан ўрин олган марказий учрашувдан кейин Рим клуби сафида гол урган ўзбекистонлик ҳужумчи Элдор Шомуродов ўйиндан кейинги фикрларини билдирди.

Иккинчи бўлимда майдонга тушган Элдор кўп ўтмай, аниқроғи 49-дақиқадаёқ туринликлар дарвозасига гол уриб, жамоасини мағлубиятдан қутқариб қолди.

“Майдонга чиқишдан олдин мураббий Раньери Довбикни ҳужумда қўллаб-қувватлашимни сўради. Иккинчи бўлимни яхши бошладик, афсуски, ғалаба қозона олмадик. Бизда иккинчи гол уриш учун имкониятлар бўлди. Ваҳоланки, “Ювентус”га қарши ўйиндаги бир очко яхши натижа”, дейди Шомуродов.

Ҳужумчи гол урганидан хурсандлигини яширмай, кўпроқ гол урмоқчи бўлганини қўшимча қилди.

“Албатта, хурсандман. Аммо дублга эришганимда, янада хурсанд бўлардим. Кейинги ўйинга яхши тайёргарлик кўришимиз ва шу савиядаги ўйинни давом эттиришимиз керак. Асосийси, мухлисларни хурсанд қилиш”, дейди ҳужумчи.

Маълумот учун, 29 ёшли ўзбекистонлик форвард жорий мавсумда “Рома” сафида барча мусобақаларда 30 та ўйин ўтказиб, 6 та гол урди ва 3 та голли узатмани амалга оширди.