Исроил Британиянинг 2 депутатини депортация қилди 

Буюк Британиянинг Лейбористлар партиясидан парламентга сайланган депутатлар Юан Янг ва Абтисам Муҳаммад Исроилга киритилмади ва депортация қилинди. Бу ҳақда “The Times of Israel” хабар берди.

Қайд этилишича, парламент делегацияси таркибидаги сиёсатчиларнинг Исроилга киришига рухсат берилмаган ва депортация қилинган. Ҳодиса Тель-Авивдаги Бен Гурион аэропортида содир бўлган.

Нашрга кўра, Ян ва Муҳаммад Исроилга расмий делегация таркибида Лутон шаҳридан келганини ва “Исроил хавфсизлик кучларининг ҳаракатларини ҳужжатлаштириш ниятида эканини” айтишган. Бироқ Исроил томони уларнинг мақсадларини провокацион ва Исроил мудофаа кучлари (ЦАХАЛ) ҳаракатларига қарши нохолис қарашларни тарқатишга қаратилган деб ҳисоблаган.

Буюк Британия Ташқи ишлар вазири Дэвид Лэмми Лондон Тель-Авивнинг икки Британия депутатини мамлакатга киритмаганидан хавотирда эканини билдирди. Унинг айтишича, Исроил расмийларининг хатти-ҳаракатлари “қабул қилиб бўлмайдиган, самарасиз ва чуқур ташвишли”.

Британия Ташқи ишлар вазири Исроил ҳукуматидаги “ҳамкасбларига қироллик парламенти аъзоларига “бундай муносабатда бўлиш мумкин эмаслигини” очиқ айтди.

Дэвид Лэммининг таъкидлашича, Буюк Британия ҳукумати ўт очишни тўхтатиш режимига қайтишни таъминлаш ва қон тўкилишини тўхтатиш, гаровга олинганларни озод қилиш ва Ғазодаги можарога барҳам бериш бўйича музокаралар олиб боришда давом этмоқда.

Маълумот учун, депутатлар Юан Янг ва Абтисам Муҳаммад Исроилга қарши бойкот ва санкцияларга чақиришлари билан танилган. Февраль ойи бошида Исроил мамлакатда расмий ташриф билан бўлган Европарламент аъзолари Лин Бойлан ва Рима Ҳасанни ҳам мамлакатга киритмаган эди.