Қирғизистон ва Тожикистон чегара делимитацияси бўйича битим имзолади (видео)

Қирғизистон Миллий хавфсизлик давлат қўмитаси раиси, Вазирлар Маҳкамаси раисининг ўринбосари Қамчибек Ташиев ва Тожикистон Миллий хавфсизлик давлат қўмитаси раҳбари Саймўмин Ятимов Бишкекда умумий чегара участкасини делимитация қилиш бўйича протоколни имзолади. Бу ҳақда Қирғизистон ҳукумати матбуот хизмати хабар берди.

“Қирғизистон ва Тожикистон ўртасида чегара делимитацияси бўйича протокол имзоланди. Ҳужжатга қирғиз томонидан Ташиев, тожик томонидан эса Ятимов имзо чекди”, дейилади хабарда.

Маълумот учун, Қирғизистон ва Тожикистон ўртасидаги давлат чегараси узунлиги тахминан 980  километрни ташкил этади. Чегарани делимитация қилиш бўйича музокаралар 2002 йил декабрь ойидан буён давом этмоқда. Ушбу масаланинг ҳал этилмагани икки давлат аҳолиси ва ҳарбийлари иштирокидаги можароларга сабаб бўлиб келган, уларда ўқотар қуроллар ҳам ишлатилган. Сўнгги жиддий тўқнашув 2022 йил кузида содир бўлган. 2014 йилдан бери Қирғизистон-Тожикистон чегарасида 10 дан ортиқ йирик можаро кузатилган. Қирғизистон Хитой, Қозоғистон, Ўзбекистон ва Тожикистон билан чегарадош. Тожикистон эса, шу кунга қадар, Қирғизистон билан барча чегара масалаларини ҳал қила олмаган сўнгги қўшни давлат эди.

Эслатиб ўтамиз, Қирғизистон Президенти Садир Жапаров жорий йил январь ойида “Кабар”га берган интервьюсида делимитация бўйича ҳужжат имзоланганидан сўнг унга икки давлат Ташқи ишлар вазирлари имзо қўйиши кераклигини билдирган эди. Шундан сўнг, протокол икки мамлакат парламентлари томонидан ратификация қилиниши лозим. Унинг сўзларига кўра, Тожикистон билан чегара масаласи ҳал этилар экан, иккала томоннинг позицияси ҳисобга олинган.