Ботир Қодиров жавобгарликка тортилди

Шоир Шамсиддин Тўраев хонанда Ботир Қодиров устидан тегишли тартибда муаллифлик ҳақини тўламасдан шеърларини қўшиқ қилгани учун Адлия вазирлигига шикоят қилди. Бу ҳақда Адлия вазирлиги Интеллектуал мулк департаменти хабар берди.

Қайд этилишича, Адлия вазирлиги томонидан “Шамсиддин Садоий” тахаллуси билан танилган шоир Шамсиддин Тўраевнинг мурожаати асосида “Давлатинг борида”, “Омонат” ва “Тингла дўстим” номли шеърлари хонанда Ботир Қодиров томонидан ҳуқуқ эгаси рухсатисиз ҳамда тегишли тартибда муаллифлик ҳақини тўламасдан фойдаланилгани аниқланган.

Ҳолат юзасидан ҳуқуқбузарга нисбатан Маъмурий жавобгарлик тўғрисидаги кодекснинг 177¹-моддаси (Муаллифлик ҳуқуқини ва турдош ҳуқуқларни бузиш) билан маъмурий ҳуқуқбузарлик тўғрисидаги баённома расмийлаштирилиб, тегишли судга юборилган.

Тошкент шаҳар жиноят ишлари бўйича Чилонзор туман судининг қарорига кўра, ҳуқуқбузарга нисбатан Ўзбекистон Республикаси Маъмурий жавобгарлик тўғрисидаги кодекснинг 177¹-моддасининг биринчи қисми билан базавий ҳисоблаш миқдорининг 5 баравари миқдорида – 1 млн 875 минг сўм жарима жазоси  тайинланган.

Маълумот учун, Ўзбекистон Республикаси “Муаллифлик ҳуқуқи ва турдош ҳуқуқлар тўғрисида”ги қонунининг 65-моддасига асосан  муаллиф ёки мутлақ ҳуқуқларнинг бошқа эгаси ҳуқуқбузардан зарар қопланиши ўрнига базавий ҳисоблаш миқдорининг йигирма бараваридан минг бараваригача миқдорда тўланиши лозим бўлган товонни тўлашини талаб қилишга ҳақли ҳисобланади.

Эслатиб ўтамиз, аввалроқ Ўзбекистонда хизмат кўрсатган артист Авазбек Олимов муаллифлик ҳуқуқини бузгани учун 170 млн сўм жаримага тортилганди. Хонанда Авазбек Олимов “Гўзал ёрим” шеърини шоиранинг рухсатисиз йиллар давомида “Севар ёрим” номи остида ўзгартириб куйлаб келган. Шундан сўнг, шоира Маҳлиё Аҳророва муаллифлик ҳуқуқлари бузилгани учун 200 млн сўм маънавий зарар ҳамда 340 млн сўм товон пули талаб қилиб, судга шикоят киритган.