Златко Далич Осиёдан ўзига иш топди

Хорватиялик Златко Далич БАА миллий футбол терма жамоасининг янги бош мураббийи этиб тайинланди. Бу ҳақда БАА футбол ассоциацияси матбуот хизмати хабар берди.

Аввалроқ, Далич Хорватия терма жамоасини тўққиз йил бошқарганидан сўнг бош мураббийлик лавозимини тарк этган эди.

“Хуш келибсиз, Златко Далич! БАА футбол ассоциацияси хорватиялик мутахассисни миллий терма жамоанинг янги бош мураббийи этиб тайинлаганидан мамнун”,  дейилади ассоциация баёнотида.

“Transfermarkt” маълумотларига кўра, хорватиялик мутахассиснинг шартномаси 2030 йил 30 июнга қадар амал қилади.

БАА терма жамоасининг аввалги бош мураббийи, руминалик Космин Олерою май ойида жамоа Жаҳон чемпионатига чиқа олмаганидан сўнг ишдан бўшатилган эди.

Маълумот учун, 59 ёшли Далич раҳбарлигида Хорватия терма жамоаси 2018 йилда Россияда бўлиб ўтган Жаҳон чемпионатида кумуш, 2022 йилда Қатарда бўлиб ўтган Жаҳон чемпионатида бронза медалини қўлга киритган. 

2026 йилги Жаҳон чемпионатида Хорватия терма жамоаси плей-офф босқичига чиққан, аммо 1/16 финалда Португалияга 2:1 ҳисобида мағлуб бўлган.

Далич бунга қадар Хорватиянинг “Риека” ва “Славен”, Саудия Арабистонининг “Ал-Файсалий” ва “Ал-Ҳилол” ҳамда БААнинг “Ал-Айн” клубларига мураббийлик қилган.