Келдиёрова ва Бобонов Загреб Гран-при мусобақасида иштирок этади

Париж-2024 Олимпиадаси чемпиони Диёра Келдиёрова ва Токио-2020 Олимпиадаси бронза медали соҳиби Давлат Бобонов жорий йилнинг 13-15 ноябрь кунлари Хорватиянинг Загреб шаҳрида дзюдо бўйича ўтказиладиган Гран-при мусобақасида иштирок этади. Бу ҳақда Ўзбекистон дзюдо федерацияси матбуот хизмати хабар берди.

Дунёнинг 70 та мамлакатидан 500 нафардан зиёд дзюдочи қатнашадиган мазкур нуфузли турнирда Ўзбекистоннинг 5 нафар вакили медаллар учун кураш олиб боради.

Эътиборлиси, қисқа муддатли танаффусдан сўнг Токио-2020 Олимпиадаси совриндори, жаҳон чемпиони Давлат Бобонов яна татамига қайтмоқда. У Загреб Гран-при мусобақасида медаллар ва қимматли рейтинг очколари учун баҳслашади.

Давлат Бобонов сўнгги бор жорий йилнинг 26-28 июнь кунлари Хитойда ўтказилган Циндао Гран-при мусобақасида иштирок этган эди.

Шунингдек, Хорватияга йўл оладиган таркибдан Париж-2024 Олимпиадаси чемпиони Диёра Келдиёрова ҳам ўрин олган. Бу унинг катта спортга қайтганидан кейинги учинчи мусобақаси бўлади.

Ўзбекистон терма жамоасининг Загреб Гран-при мусобақаси учун таркиби:

• 66 кг: Азизбек Ортиқов;
• 81 кг: Арслонбек Тожиев, Муроджон Йўлдошев;
• 90 кг: Давлат Бобонов;
• 52 кг: Диёра Келдиёрова.

Эслатиб ўтамиз, аввалроқ Диёра Келдиёрова Абу-Дабида ташкил этилган “Катта дубулға” турнирининг иккинчи даврасида исроиллик Гефен Примога имкониятни бой берганди.