Жезус Роналдунинг баёнотига жавоб қайтарди

Португалия терма жамоаси бош мураббийи Жорже Жезус жамоа сардори Криштиану Роналдунинг Миллатлар лигаси баҳслари вақтида терма жамоа йиғинини тарк этгани сабаблари ҳақидаги баёнотини ўқимаганлигини айтди. Бу ҳақда Жезус “A Bola” нашрига берган интервьюсида сўз очди.

“Мен терма жамоанинг ўйини учун Лейрияда эдим. Ҳозир баёнотни ўқиб чиқаман, ҳозирча айтадиган бошқа гапим йўқ”, дейди Жезус.

Аввалроқ, Роналду ёзма баёнотида бош мураббийни унга берган ваъдаларини икки марта бажармаганликда айблаган эди. Футболчининг сўзларига кўра, Норвегияга қарши сафар учрашувидан олдин Жезус унга 30 дақиқа майдонда ҳаракат қилишини айтган. Бироқ иккинчи бўлимда ярим соат давомида чигалёзди машқларини бажарган ҳужумчи ўйинга туширилмаган. Жезуснинг ўзи эса кейинчалик бу қарорни жамоа манфаатларидан келиб чиқиб қабул қилганини айтган.

Роналду, шунингдек, терма жамоа йиғинини тарк этгани учун жамоадошлари ва мухлисларидан узр сўради. У интизомий жазо олганидан кейин ҳам Португалия терма жамоаси сафида ўйнашни давом эттиришга тайёрлигини билдирди.

Жезус эса Роналдунинг терма жамоага қайтиши учун эшик очиқ эканини билдирган. Мураббийнинг таъкидлашича, футболчи хоҳласа ва “Ал-Наср”да ўйнашда давом этса, кейинги йиғинда терма жамоага чақирилиши мумкин.