Жефф Безос “Ливерпуль”нинг бир қисмини сотиб олди
Sport
−
17:25 494 2 minutes
“Ливерпуль” клубининг амалдаги эгаси Fenway Sports Group (FSG) жамоадаги озчилик улушини Жефф Безос иштирокидаги консорциумга сотиш бўйича келишувга эришди. Бу ҳақда клуб матбуот хизмати хабар берди.
“1892 Holdings” деб номланган консорциумга “Куинз Парк Рейнджерс”нинг собиқ раиси Амит Бхатия раҳбарлик қилади. Унинг таркибига Mittal Family Trusts, EE Capital ҳамда Безос етакчи инвестор бўлган K5 Sports жамғармаси киради.
“Reuters” хабарига кўра, консорциум сотиб оладиган улуш клуб акцияларининг тахминан учдан бир қисмини ташкил этади. Шу билан бирга, 2010 йилда “Ливерпуль”ни сотиб олган АҚШнинг Fenway Sports Group компанияси клубдаги назорат пакетини ва оператив бошқарувни сақлаб қолади.
Келишув доирасида Амит Бхатия “Ливерпуль”нинг янги вице-раисига айланади ва кенгайтирилган директорлар кенгашидан ўрин олади. Шунингдек, EE Capital вакили Элейн Саверин ҳамда K5 Sports вакили Брайан Баум кенгаш таркибига қўшилади. Маълумотига кўра, Жефф Безоснинг ўзи директорлар кенгашидан ўрин олмайди.
“Бундай даражадаги клубда ҳамкор сифатида кутиб олинишимиз катта шараф. Биз бу сармояни “Ливерпуль” ва унинг раҳбариятига чуқур ишонганимиз ҳамда келгуси йилларда клуб муваффақиятини қўллаб-қувватлашни истаганимиз учун амалга оширмоқдамиз”, дейди Бхатия.
Маълумот учун, 20 карра Англия чемпиони бўлган “Ливерпуль” ўтган мавсум Премьер-лигада бешинчи ўринни эгаллаган. Жамоа янги мавсумни 23 август куни “Ньюкасл Юнайтед”га қарши баҳс билан бошлайди.
