“Ёмон иш қилмаган”. Трамп Nvidia раҳбарининг ишқий муносабати ҳақида гапирди

АҚШ Президенти Дональд Трамп хотинига хиёнат қилганини ва айғоқчиликда гумон қилинган хитойлик аёл билан ишқий муносабатда бўлганини тан олган Nvidia бош ижрочи директори Женсен Хуанг атрофидаги можарога изоҳ берди. Бу ҳақда у кеча, 10 ноябрь куни журналистлар билан суҳбатда гапирди.

“Бугун мен Женсен билан гаплашдим. У менга бу аёлнинг айғоқчи эканини ҳеч қачон билмаганини айтди ва мен унга ҳақиқатан ҳам ишонаман”, дейди Трамп журналистларнинг саволларига жавоб берар экан.

У Хуангни мамлакат учун “ҳайратланарли даражада катта иш қилган”, “жуда юқори ахлоқий фазилатларга эга инсон” деб ҳисоблашини қўшимча қилган. 

“Биласизми, ўйлаб кўрсангиз, унда технологиялардан 10 йил олдинда бўлган чип бор. Дизайнининг мураккаблиги сабабли уни ҳатто нусхалаб ҳам бўлмайди. Мен шунчаки ҳеч қандай муаммо юзага келмайди деб умид қиламан. Мен унинг баёнотини ўқиб чиқдим ва у айниқса ўз оиласи, ўзи яхши кўрадиган аёли сабабли жуда қаттиқ азоб чекаётганига ишонаман”, дейди Трамп.

Nvidia раҳбари у билан Осиё бўйлаб сафарга борадими ёки йўқми деган саволга жавобан АҚШ Президенти уни “сўзсиз ўзи билан бирга олиб кетишини” айтган. 

“Мен унинг бирор ёмон иш қилганини эшитмадим. У ким биландир муносабатда бўлган, ахир бошқа ҳамма ҳам ким биландир муносабатда бўлади-ку”, дея қўшимча қилган Трамп.

Эслатиб ўтамиз, аввалроқ Американинг энг йирик чип ишлаб чиқарувчиси бўлган Nvidia компанияси раҳбари Женсен Хуанг Хитой махсус хизматларига ишлагани айтилаётган аёл билан ишқий муносабатда бўлгани ҳақида хабар берилган эди. Ушбу хабарлар юзасидан мустақил текширув ўтказилади. Хуангнинг ўзи эса хотинига хиёнат қилганини тан олди.