Янги Тошкентдаги фаввора “Гиннесснинг рекордлар китоби”га кирди

Янги Тошкентда бугун, 28 август куни Ўзбекистон Республикаси Мустақиллигининг 35 йиллиги муносабат билан очилаётган фаввора дунёдаги энг баланд мусиқали фаввора сифатида “Гиннесснинг рекордлар китоби”дан жой олди. Бу ҳақда Президент Шавкат Мирзиёев Мустақиллик байрам тантаналаридаги нутқида сўз очди.

Президент ўз нутқида тантана иштирокчилари ҳузурида очиладиган фаввора дунёдаги энг баланд мусиқали фаввора сифатида “Гиннесснинг рекордлар китоби”дан жой олгани байрам кайфиятига янада баланд руҳ бағишлашини қайд этган.

“Бир неча юз йиллик орзулар рўёбга чиқаётган ушбу бетакрор маконда бутун халқимиз билан ҳали яна кўплаб қувончли ва тарихий воқеаларга гувоҳ бўламиз”, дейди Шавкат Мирзиёев.

Президентга кўра, келгусида илм-фан, таълим ва маданият маркази бўладиган ушбу ҳудудда куни кеча Янги Ўзбекистон университети, Низомий номидаги Ўзбекистон Миллий педагогика университети ҳамда Ўзбекистон миллий кутубхонасининг муҳташам бинолари ишга туширилган.

“Аминманки,  Янги Тошкент пойтахтимизнинг кўркига кўрк қўшиб,  биз барпо этаётган Янги Ўзбекистоннинг куч-қудратини намоён этадиган чинакам тараққиёт марказига айланади”, дейди Президент.