Вучич президентликдан қачон кетишини айтди

Сербия Президенти Александр Вучич жорий йилнинг 25 ёки 26 сентябрь куни истеъфога чиқишини ва шундан сўнг сайловолди кампаниясида оддий фуқаро сифатида қатнашишини маълум қилди. Бу ҳақда “Euronews” хабар берди.

Вучичнинг айтишича, у Нью-Йоркдан қайтиши билан президентлик лавозимини тарк этади.

“Мен Нью-Йоркдан қайтишим билан истеъфога чиқаман. Менимча, бу 25 ёки 26 сентябрда бўлади. Шундан сўнг оддий фуқаро сифатида сайловолди кампаниясига киришаман. Мен президент сифатида бош вазирлик учун кампания олиб боришни истамайман”, деган Вучич.

У шу пайтгача ҳеч бир президент аввал истеъфога чиқиб, кейин оддий фуқаро сифатида сайловолди кампаниясида қатнашмаганини таъкидлаган.

“Ҳеч бир президент бундай қилмаган. Мен биринчи бўлишни хоҳлайман. Оддий инсон ва оддий фуқаро сифатида боришни истайман”, деган у.

Шунингдек, Вучич сентябрь охирида БМТ Бош Ассамблеясида сўзга чиқиб, дунёдаги вазият ҳамда минтақада тинчлик ва барқарорликни сақлаш муҳимлиги ҳақида гапиришини айтган.

Унинг айтишича, 1945 йилдан буён шаклланган дунё тартиби бузилган ва ҳозир янги тартиб учун кураш кетмоқда. Вучич бу жараён турли можаролар юзага келиш хавфини ошираётганини ҳам қайд этган.

Мамлакат қонунчилигига кўра, президент 5 йил муддатга сайланади ва бир шахс президентликка икки мартадан ортиқ сайланиши мумкин эмас. Президентнинг ваколати истеъфога чиқиши билан ҳам тугатилади. Александр Вучич 2017 йилда илк бор Сербия Президенти этиб сайланган, 2022 йилда эса иккинчи муддатга қайта сайланган. Шу сабабли у Конституцияга кўра учинчи марта президентликка номзодини қўя олмайди.

Эслатиб ўтамиз, жорий йилнинг 27 июнь куни ҳам Сербия Президенти Александр Вучич “яқин ҳафталарда” истеъфога чиқишини эълон қилган эди.