Ўзбекистоннинг Аргентина билан ўйини бекор қилинди

Лионель Мессининг Аргентина терма жамоасидаги фаолиятини якунлаши сабаб мамлакат миллий терма жамоасининг Осиёга тури ва Ўзбекистон билан ўртоқлик учрашуви бекор қилинди. Бу ҳақда “ESPN Argentina” нашри хабар берди.

Манба маълумотига кўра, Аргентина футбол ассоциацияси (AFA) жорий йилнинг 21 сентябридан 6 октябригача давом этадиган FIFA кунлари доирасида терма жамоанинг иккита ёки учта назорат учрашувини ўз майдонида ўтказишни режалаштирмоқда. Аниқ дастур ва рақиблар яқин кунларда эълон қилиниши кутилмоқда.

Дастлаб Аргентина терма жамоасининг Осиё сафари режалаштирилган эди. Шунингдек, жорий йилги мундиаль финалчилари жорий йилнинг 30 сентябрь куни Хитойда Ўзбекистон миллий терма жамоасига қарши ўртоқлик учрашуви ўтказишни режалаштирганди. Бироқ Лионель Мессининг халқаро фаолиятини якунлаш қароридан сўнг Хитойда ўтказилиши кутилган учрашув ҳам бекор бўлди. ESPN журналисти Диего Монройнинг маълум қилишича, жамоанинг бутун FIFA ойнасини ўз майдонида ўтказиш эҳтимоли 90 фоизни ташкил этмоқда.

Учрашувларнинг бир қисми Буэнос-Айресдаги “Монументаль” стадионида ўтказилиши кутилмоқда. Қолган баҳсларни қабул қилиш учун Кордова ҳам асосий номзодлардан бири сифатида кўрилмоқда. Дастлабки маълумотларга кўра, рақиблар Марказий Америка вакиллари бўлиши мумкин.

Шунингдек, КОНМЕБОЛ Жаҳон чемпионати саралаши формати бўйича FIFA билан музокаралар олиб бормоқда. Аргентина эса ЖЧ-2026 дан кейин ҳам саралаш баҳсларида расман иштирок этиш истагини билдирган.

Лионель Мессининг терма жамоадан кетиши Аргентина учун янги босқични бошлаб бермоқда. Лионель Скалони кузги ўйинлардан янги таркибни шакллантириш ва Мессисиз жамоанинг ўйинини синаб кўришда фойдаланиши мумкин.

Маълумот учун, навбатдаги FIFA кунлари 9-17 ноябрь кунлари бўлиб ўтади.

Эслатиб ўтамиз, Ўзбекистон миллий терма жамоаси олдинда турган FIFA кунлари доирасида Жанубий Корея ва Эрон терма жамоалари қарши баҳс олиб бориши режа қилинган. Қолган рақиблар эса ҳали маълум эмас.