Ўзбекистонда чорвачиликка янги имтиёзлар берилади

Ўзбекистонда чорвачилик тармоғини ривожлантириш, маҳаллий ишлаб чиқаришни кенгайтириш ва соҳани молиявий қўллаб-қувватлаш бўйича қўшимча чоралар белгиланди. Бу ҳақда Президентнинг “Чорвачилик тармоғи лойиҳаларини қўллаб-қувватлаш бўйича қўшимча чора-тадбирлар тўғрисида”ги қарорида белгиланди.

Қарорга кўра, жорий йилнинг 1 сентябрдан 2030 йил 1 январгача наслдор қорамол етиштирувчи хўжаликларга субсидиялар ажратилади. Жумладан, биринчи наслдор урғочи бузоқ олинганда 1,5 млн сўм, иккинчи наслдор урғочи бузоқ учун 2 млн сўм, шунингдек, бузоқларни сақлаш харажатларини қоплаш учун алоҳида субсидиялар берилади.

Шунингдек, хориждан йирик ва майда шохли қорамолларни олиб келиш, уларни чорвачилик хўжаликлари ҳамда аҳоли хонадонларига етказиб бериш билан шуғулланувчи сервис корхонаси ташкил этилади. Ушбу корхона чорва моллари етказиб берилгач, камида 12 ой давомида озиқлантириш, ветеринария, сунъий уруғлантириш ва наслчилик хизматларини кўрсатади.

Қарорда чорвачиликка ихтисослашган ҳудудларда янги лойиҳаларни амалга ошириш, тадбиркорларни молиявий қўллаб-қувватлаш ва чорва моллари етиштириш имкониятларини кенгайтириш бўйича ҳам қатор вазифалар белгиланган.

Бундан ташқари, чорвачилик лойиҳалари учун ем-хашак экинларини етиштириш мақсадида бўш турган қишлоқ хўжалиги ер участкаларини электрон онлайн аукционларга чиқариш кўзда тутилган.

Эслатиб ўтамиз, аввалроқ Ўзбекистон ҳудудида жисмоний ёки юридик шахслар томонидан сақланадиган ва (ёки) кўпайтириладиган ҳайвонлар белгиланган тартибда идентификация қилиниши ҳамда рўйхатга олиниши кераклиги ҳақида хабар берилган эди.