UEFA FIFA’дан 2 ҳафтада муҳим ҳужжатларни тақдим этишни талаб қилди

Европа футбол иттифоқи (UEFA) Халқаро футбол федерациясига (FIFA) ташкилотнинг сўнгги муҳим қарорларига оид ҳужжатларни жорий йилнинг 2 ноябрига қадар тақдим этиш талаби билан хат юборди. Бу ҳақда BBC хабар берди.

Мазкур хат ўтган ҳафта бўлиб ўтган FIFA Кенгаши йиғилишидан сўнг юборилган. Йиғилишда UEFA вакиллари ташкилот раҳбарияти ҳамда FIFA президенти Жанни Инфантинога бир қатор саволлар билан мурожаат қилган. Бироқ уларга жавоб берилмаган, сўралган ҳужжатлар ҳам тақдим этилмаган.

Шундан сўнг, Европа ташкилоти бошқарув ва қарорлар қабул қилиш жараёнларига оид саккиз саҳифалик саволлардан иборат расмий сўров юборган.

BBC келтирган UEFA баёнотида айтилишича, маълумот ёки ҳужжатларни тақдим этишдан бош тортиш асослантирилиши керак. Шунингдек, саволларга ҳозир жавоб берилиши, уларни FIFA Кенгашининг навбатдаги йиғилишигача қолдириш мумкин эмаслиги қайд этилган.

UEFA сўровида бир қатор масалаларга ойдинлик киритишни талаб қилмоқда. Улар қаторида FIFA Forward Enterprise лойиҳасига хусусий инвесторларни жалб қилиш бўйича амалга ошмаган режалар, АҚШ Президенти Дональд Трампга тинчлик мукофотининг топширилиши ҳамда америкалик футболчи Фоларин Балогуннинг Жаҳон чемпионати вақтида олган қизил карточкаси бекор қилиниши билан боғлиқ ҳолатлар бор.

Шунингдек, UEFA Жаҳон чемпионатини ташкил этишда иштирок этган АҚШ ташкилотидан Инфантино олгани айтилган, декларация қилинмаган тўловлар ва амалда фойдаланилмаган Trump Tower офислари учун тахминан 4 миллион доллар миқдорида ижара тўлови амалга оширилгани ҳақидаги саволларга ҳам жавоб талаб қилмоқда.

Аввалроқ, UEFA, Осиё футбол конфедерацияси (ОФК) ҳамда Шимолий, Марказий Америка ва Кариб ҳавзаси футбол конфедерацияси (CONCACAF) FIFA ва Инфантинони ташкилотнинг тижорий фаолиятига хусусий инвесторларни жалб қилиш режаси учун танқид қилган эди.

UEFA FIFA турнирларини, жумладан, Жаҳон чемпионатини бойкот қилиш эҳтимолини билдирганидан сўнг, Инфантино федерация айрим тижорий ҳуқуқларни сотиш режасидан воз кечганини маълум қилган.

Эслатиб ўтамиз, аввалроқ FIFA 2025 йилда таъсис этилган Тинчлик мукофотини бекор қилмоқчи эканлиги ҳақида хабар берилганди.