Трамп “Сунъий интеллект кучлари” тузишини маълум қилди

АҚШ Президенти Дональд Трамп мамлакатда “Сунъий интеллект кучлари” ташкил этилишини маълум қилди. Бу ҳақда Трамп Truth Social’даги саҳифасида ёзиб қолдирди.

Трампнинг айтишича, янги тузилма сунъий интеллект соҳасидаги ривожланишни қўллаб-қувватлаш билан бирга, технологиядан келиб чиқиши мумкин бўлган салбий ҳолатларни ҳам назорат қилади. Бироқ у “Сунъий интеллект кучлари”нинг аниқ вазифалари, таркиби ва қандай фаолият юритиши ҳақида ҳозирча батафсил маълумот бермаган.

АҚШ Президенти сунъий интеллект саноатининг ривожланишига тўсқинлик қилинмаслигини, аксинча, уни қўллаб-қувватлашларини айтган. Унинг қайд этишича, маълумотлар марказларига қарши билдирилган эътирозлар ҳам катта даражада муваффақиятсизликка учраган.

“Биз бу ажойиб саноатнинг ривожланишини ҳеч қандай тарзда чекламаймиз ёки унга босим ўтказмаймиз. Аксинча, уни қўллаб-қувватлаймиз, ёрдам берамиз ва ривожланишини яқиндан кузатиб борамиз”, деган Трамп.

Шунингдек, у сунъий интеллектдан келиб чиқиши мумкин бўлган хавфлар амалдаги жиноят ва фуқаролик ҳуқуқи тизими орқали назорат қилинишини таъкидлаган.

Бундан ташқари, Трамп яқин орада “Сунъий интеллект қироли”ни тайинлашини маълум қилган. Ушбу шахс сунъий интеллект хавфсизлиги учун масъул бўлади. Президент бу лавозимга фақат юқори IQ даражасига эга бўлганлар ариза топшириши кераклигини айтган.

Агар Трамп ваъдасини амалга оширса, бу унинг иккинчи “Сунъий интеллект қироли” бўлади. Аввал ушбу лавозимни венчур капиталисти Дэвид Сакс эгаллаган. У баҳорда лавозимни тарк этиб, ташқи маслаҳатчи сифатида фаолиятини давом эттирганди.

Маълумот учун, “Сунъий интеллект кучлари”нинг ҳарбий ёки фуқаролик тузилмаси бўлиши, ваколатлари ва бюджети ҳозирча аниқлаштирилмаган.

Трамп сунъий интеллект келажакда АҚШ иқтисодиётида катта ўрин эгаллашини таъкидлаган. Унинг фикрича, ушбу технология мамлакат ялпи ички маҳсулотининг 25 фоизигача қисмини ташкил қилиши мумкин. Шунингдек, у АҚШ сунъий интеллект соҳасида Хитой ва дунёнинг бошқа давлатларидан олдинда эканини айтган.

Эслатиб ўтамиз, аввалроқ америкалик ҳарбийлар шу баҳорда Форс кўрфазида сунъий интеллектнинг хатоси оқибатида пайдо бўлган разведка ҳисоботига ишониб, Хитой кемасига зарба беришга тайёргарлик кўргани ҳақида хабар берилган эди.