Трамп Россия ва Украинага учта таклиф билан чиқди

АҚШ Президенти Дональд Трамп маъмурияти Россия ва Украина ўртасидаги урушни юмшатиш учун 3 та зудлик билан амалга оширилиши керак бўлган чорани таклиф қилди. Бу ҳақда Украина Президенти Владимир Зеленский “Axios” нашрига берган интервьюсида маълум қилди.

Қайд этилишича, Вашингтоннинг биринчи таклифи Россия ва Украина ўртасида энергетика инфратузилмаларига қарши ўзаро зарбаларни тўхтатиш бўйича келишувга эришишдан иборат.

Иккинчи таклиф Қора денгиздаги дон йўлагининг фаолиятини қайта тиклашни назарда тутади. Учинчиси эса АҚШ, Россия ва Украина иштирокида уч томонлама музокаралар ўтказишдан иборат.

“Axios” уч томонлама учрашув учун Абу-Дабини эҳтимолий жой сифатида кўрсатган. Зеленский Киев бундай таклифни қабул қилишга тайёрлигини айтган.

“Биз музокараларга очиқмиз – исталган жойда ва исталган форматда”, деган Зеленский.

Зеленскийнинг айтишича, уч томонлама учрашув декабрь ойида Майамида ўтказилиши режалаштирилган G20 саммити доирасида ҳам ташкил этилиши мумкин. Унинг сўзларига кўра, бу масала Трамп билан суҳбатда ҳам муҳокама қилинган.

Бироқ Украина Президенти Россия Президенти Владимир Путиннинг музокараларга тайёрлигига шубҳа қилаётганини билдирган. Шунингдек, Зеленский Путиннинг уч давлат раҳбарлари учрашувидан қочиш учун “бирор сабаб топиши” мумкинлигини айтган.

“Axios”нинг хабардор манбасига кўра, Россия Президентининг махсус вакили Кирилл Дмитриев Нью-Йоркка келиб, АҚШнинг махсус вакили Стив Уиткофф ва Жаред Кушнер билан учрашади. Учрашувда АҚШнинг сўнгги таклифлари муҳокама қилиниши кутилмоқда.

Шунингдек, “ZN.UA” дипломатик манбаларга таяниб, Нью-Йоркда Украина Президенти офиси раҳбари Кирилл Буданов, АҚШ махсус вакили Стив Уиткофф ва Россия махсус вакили Кирилл Дмитриев ўртасида уч томонлама учрашув тайёрланаётганини хабар қилган. Россия томони эса бундай учрашув режалаштирилаётганини рад этган.

Эслатиб ўтамиз, аввалроқ Франция Президенти Эммануэль Макрон АҚШ Президенти Дональд Трамп билан Украина ва Россия масаласида узоқ суҳбатлашганини, жумладан, энергетика объектларига ҳужумларни тўхтатиш бўйича мораторий ҳамда Киевга тутиб қолувчи ракеталарни тезроқ етказиб бериш масалаларини муҳокама қилганини айтганди.