Тошкентда аввал ҳам судланган шахс 1,2 кг наркотик билан ушланди

Тошкентда интернет орқали наркотик моддалар савдоси билан шуғулланган, аввал ўғрилик учун судланган шахс ушланди. Ундан жами 1 кг 207 грамм синтетик наркотик моддалар топилди. Бу ҳақда Давлат хавфсизлик хизмати хабар берди.

Қайд этилишича, Давлат хавфсизлик хизматининг Тошкент шаҳар бўйича бошқармаси ходимлари шаҳар Ички ишлар бош бошқармаси билан ҳамкорликда ўтказган тезкор тадбирда Юнусобод туманидаги “Уч қаҳрамон” йўл-патруль хизмати масканида пойтахтга кириб келаётган Spark автомобили тўхтатилиб, текширилган.

Текширув давомида автомобилда йўловчи сифатида кетаётган, 2004 йилда Сурхондарё вилоятида туғилган шахсга тегишли целлофан пакетдан 200 та кичик пакетга жойланган 365 грамм “мефедрон” синтетик наркотик моддаси топилиб, ашёвий далил сифатида олинган.

Шундан сўнг тезкор тадбир давом эттирилиб, унинг Тошкент туманида вақтинча яшаб турган хонадони кўздан кечирилган. У ердан яна 734 грамм “мефедрон”, 63 грамм “Альфа-PVP”, 45 грамм “спайс”, иккита электрон тарози, кичик пакетлар ва бошқа ашёлар процессуал тартибда расмийлаштириб олинган.

Аниқланишича, аввал ўғрилик жинояти учун судланган шахс интернетдаги наркодўконда “закладчик”, яъни наркотик моддаларни яширин жойларга қўйиб кетувчи шахс сифатида ишлаган.

Билдирилишича, ҳолат юзасидан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Сурхондарё вилоятида қарийб 42 килограмм наркотик мусодара қилинганди.